"ბადანტემ" მოხუცის მოკვლა ანტიფრიზით სცადა

ამბავი, რომელიც შესაძლოა ტრაგედიით დასრულებულიყო, იტალიაში, ტურინის პროვინციაში მოხდა. საავადმყოფოში, სასწრაფო დახმარების მანქანით, 88 წლის მოხუცი შეიყვანეს, მძიმე ინტოქსიკაციის სიმპტომებით, მას თან მომვლელი ახლდა. გამოკვლევებმა აჩვენა, რომ მოხუცს მანქანის ანტიფრიზი ჰქონდა ორგანიზმში. საქმეში სასწრაფოდ პოლიცია ჩაერთო და სულ მალე, მოხუცის 46 წლის, ეროვნებით პერუელი „ბადანტე“ დააკავეს, განზრახ მკვლელობის მცდელობის ბრალდებით.

მოვლენები საავადმყოფოში მოხვედრამდე, შემდეგნაირად ვითარდებოდა... მომვლელი მოხუც მამაკაცთან სამ წელზე მეტ ხანს მუშაობდა. დროთა განმავლობაში მისი ნდობა მოიპოვა, გარკვეული პერიოდის შემდეგ ნოტარიუსთან წაიყვანა და მოტყუებით, ის სახლი რომელშიც ცხოვრობდნენ, საკუთარ სახელზე გააფორმებინა.

როგორც გამოძიებამ დაადგინა, „ბადანტეს“ რაღაც პერიოდის შემდეგ ეჭვი შეეპარა, რომ მოხუცი ყველაფერს მიუხვდა, „მემკვიდრეობის“ დაკარგვის საფრთხე იგრძნო და მისი მოკვლა განიზრახა. ამისთვის კი შემდეგ ხერხს მიმართა - ერთ-ერთი სასმლის ბოთლში ანტიფრიზი ჩაასხა და მოხუცმა სითხე ისე დალია, თავიდან ვერც მიხვდა რას სვამდა.

მამაკაცი სიკვდილს გადაურჩა, ხოლო მისი მომვლელი კი პოლიციამ დააპატიმრა. როგორც ზემოთ აღვნიშნეთ, მის წინააღმდეგ, განზრახ მკვლელობისა და თაღლითობის ბრალდებით, აღიძრა საქმე.