ფულადი დახმარების მიღება, იტალიაში მყოფ ემიგრანტებსაც შეუძლია - რას ნიშნავს „Reddito di emergenza“

იტალიის მთავრობამ, პანდემიიდან გამოწვეული კრიზისის დაძლევის მიზნით, მოქალაქეების დასახმარებლად, ვისაც პანდემიის გამო სოციალური პრობლემები შეექმნათ ფულადი დახმარების პროგრამა „Reddito di emergenza“ (საგანგებო დახმარება) აამოქმედა. სოციალური დახმარების კვოტა, ერთ პირზე 400-დან 840 ევრომდე განისაზღვრა.

ხსენებული სოციალური პროგრამით სარგებლობა, იტალიაში მყოფ ემიგრანტებსაც შეუძლია. რა შემთხვევაში და ვისთვის არის შესაძლებელი „Reddito di emergenza“-ს მიღება, ამ კითხვებზე პასუხების მისაღებად, იტალიის პროფკავშირების, საემიგრაციო საზოგადოება „ანოლფ“-ის (Anolf) ქართველ ოპერატორს, ფიქრია კუჭუხიძეს დავუკავშირდით. 

პოსტკოვიდ დახმარება „Reddito di emergenza“-ს მოთხოვნის მოდულების „Anolf“-დან გადაგზავნა  2020 წელს დავიწყეთ. სოციალურ დახმარების მიღების პრაქტიკის გადაგზავნა ეტაპობრივად, ყოველ 3 თვეში ერთხელ ხდება.  მოთხოვნის გაგზავნის ბოლო ეტაპი იყო 1 ივლისიდან 31 ივლისის ჩათვლით.

რა სოციალური კრიტერიუმების მქონე პირს ეკუთვნის „Reddito di emergenza“?  

ყველას, განურჩევლად ეროვნებისა, ვინც იტალიის ტერიტორიაზე ლეგალურად იმყოფება, აქვს ჩაწერა (Residenza), პირადობის დამადასტურებელი დოკუმენტი (Carta di identità) და ლეგალურობის დამადასტურებელი დოკუმენტი ე.წ. „permeso“ და „modello isee“. დახმარების მიღების მსურველი პირის სოციალური მდგომარეობა ასევე უნდა აკმაყოფილებს პროექტით გათვალისწინებულ პირობებს!

არ ეხება მათ, ვისაც სამართალდამცველ სტრუქტურასთან აქვს პრობლემა და მათ ვინც არ სარგებლობს „modello isee“-თ, რომლის გარეშეც გადაგზავნილი პრაქტიკები დაიბლოკებოდა. ეს INPS (სოციალური დაცვის ეროვნული ინსტიტუტი) მთავარი მოთხოვნა გახლდათ. 

ფიქრია კუჭუხიძის განცხადებით, ვინაიდან ქვეყნის ტერიტორიაზე პოსტკოვიდური რეგულაციები 30 დეკემბრამდე გრძელდება, გამომდინარე აქედან, სავარაუდოდ „Reddito di emergenza“ შესაძლებელია მიმდინარე წლის ბოლომდე გახანგრძლივდეს. სოციალური დახმარების გახანგრძლივება არ ითვალისწინებს უკვე გაგზავნილი პრაქტიკების ავტომატურად გაგრძელებას, ამისთვის საჭიროა მოთხოვნა ხელახლა იქნეს გადაგზავნილი.