არჩილ გორდულაძე: ევროპაში 150 პარტიის აკრძალვა დემოკრატიას ძირს არ უთხრის და საქართველოში ოთხი პარტიის აკრძალვა რატომ არის პრობლემა?!

ევროპაში 150 პარტიის აკრძალვა დემოკრატიას ძირს არ უთხრის და საქართველოში ოთხი პარტიის აკრძალვა რატომ არის პრობლემა?! - ამის შესახებ პარლამენტის იურიდიულ საკითხთა კომიტეტის თავმჯდომარემ არჩილ გორდულაძემ გადაცემა „დღის ქრონიკაში“ განაცხადა.

მისი თქმით, რადიკალური ოპოზიციის მუქარა, რომ საკონსტიტუციო სასამართლოს გადაწყვეტილებას სტრასბურგის სასამართლოში გაასაჩივრებენ, პრობლემას არ წარმოადგენს და მათ შეუძლიათ გაასაჩივრონ ნებისმიერი გადაწყვეტილება, რომელსაც საკონსტიტუციო სასამართლო მიიღებს, რადგან რადიკალურ ოპოზიციას საქართველოს წინააღმდეგ სტრასბურგში არაერთი საქმე აქვს წაგებული.

„ევროპის მასშტაბით 150 პარტიის აკრძალვა შესაძლებელია და დემოკრატიას ძირს არ უთხრის. 22 პარტიის აკრძალვა უკრაინაში შესაძლებელია, 8 პარტიის აკრძალვა მოლდოვაშიც დემოკრატიულია და რა, გაუქმებულია ევროპის ქვეყნებში არჩევნები?! თუ იმ მოქალაქეებს, რომლებიც ევროპის ქვეყნებში ამ პარტიებს უჭერდნენ მხარს, საარჩევნო უფლება აქვთ ჩამორთმეული?! ასე არ არის, რა თქმა უნდა, ხომ?! ზუსტად იგივე შემთხვევაა ჩვენთანაც. რა იცვლება? შემთხვევით, ის ხომ არ იცვლება, რომ ვიღაცას უნდა საქართველო დაბალ ღობედ იყოს დანახული და შეიძლება ქართველ ხალხს მიუთითო, ვის დაუჭირონ მხარი?! ისინი ეუბნებიან ქართველ ხალხს, რომ თქვენ არ იცით, ვის უნდა დაუჭიროთ მხარი და მხოლოდ და მხოლოდ ჩვენი აგენტურის მხარდაჭერა მიგიყვანთ ევროკავშირში, ხოლო „ქართულ ოცნებასთან“ ერთად ევროკავშირი შორს დაგრჩებათო.

ამ ყველაფერს ჩვენ ხომ ვხედავთ და ვიცით. აღარ არის 2003 წელი, რომ რაღაც დეზინფორმაციის გავრცელებით საზოგადოებაზე ზემოქმედება მოახდინო. ინტერნეტი და ელექტროენერგია არის ამ ქვეყანაში. არსებობენ თავისუფალი, დამოუკიდებელი მედიასაშუალებები და, რაც მთავარია, საზოგადოებას ინფორმაციაზე წვდომა აქვს და ყველა ყველაფერს კარგად ხედავს.

რაც შეეხება სტრასბურგში გასაჩივრებას, რა პრობლემაა? რა გადაწყვეტილებაც არ უნდა იყოს, წავიდნენ და გაასაჩივრონ. მათ ყველა საქმე — სისხლის სამართლის თუ ადმინისტრაციული — 10:0 ხომ წააგეს საქართველოს წინააღმდეგ?! წააგეს!

დღესაც, რაც გააკეთეს, დიპლომატებთან მისვლა და გასაუბრება, რა არის ეს, თუ არა ჩვენი სარჩელის დადასტურება, რომ ამ პარტიებს ქართველ ხალხთან სალაპარაკო არაფერი აქვთ?! ზუსტად ისე, როგორც წინასაარჩევნო კამპანიის დროს ჰქონდათ ბრიუსელში, ზუსტად იმავეს აკეთებენ ახლაც.

ერთი განსხვავებით: ამ შემთხვევაში „ნაციონალური მოძრაობა“ აღარ მიიწვიეს. იცით, რატომ გააკეთეს ეს? იმიტომ, რომ ძალიან კარგად ხედავენ, საკონსტიტუციო სასამართლოში მათი თავის გამართლების მცდელობები რამდენად უსუსურია. ეს არის გამიჯვნის პროცესი, მათი პატრონების მიერ მიღებული გადაწყვეტილებით, რომ ახლა „ნაციონალურ მოძრაობას“, როგორც კეთროვანს, აუცილებლად უნდა გაემიჯნონ, თორემ მათ ვერაფერი გადაარჩენთ საკონსტიტუციო სასამართლოში.

ამისთვის უკვე ძალიან გვიანია. ამისთვის არსებობდა 14 წელი, მაგრამ როდესაც 14 წლის განმავლობაში ერთ სინერგიაში არიან და ერთ ორგანიზმად მოქმედებდნენ, ახლა, სხდომების მიმდინარეობისას ამის მცდელობით ვერავის მოატყუებენ“, - აღნიშნა გორდულაძემ.