იტალია, ძალადობის მსხვერპლ ქალებზე, ფულად დახმარებას გასცემს

იტალიის სოციალური დაცვის ეროვნული ინსტიტუტი (INPS), დახმარებების ახალ პროგრამას "შემოსავალი თავისუფლებისთვის, იწყებს, რომლისთვისაც ბიუჯეტიდან 3 მილიონი ევრო გამოიყო. საუბარია სოციალურ დახმარებაზე ძალადობის მსხვერპლი ქალებისთვის.

დახმარება შეადგენს თვეში მაქსიმუმ 400 ევროს და თითოეულ პირზე გაიცემა 12 თვის განმავლობაში.

პროექტის მიზანია დაეხმარონ ძალადობის მსხვერპლ ქალებს დამოუკიდებლად ფეხზე დადგომაში, რეინტეგრაციისა და ემანსიპაციის პროცესში. პროექტის ავტორების განცხადებით, ფინანსების გარეშე დარჩენის შიში არ უნდა განაპირობებდეს ძალადობის მსხვერპლი ქალების ძალადობრივ გარემოში დარჩენას. ფულადი დახმარება, სწორედ ეკონომიკური გარანტიისთვისაა გამიზნული. 

დახმარება გაიცემა იმ ქალბატონებზე, რომლებიც ძალადობის წინააღმდეგ ბრძოლის ცენტრებში არიან აღრიცხვაზე. ცენტრები აკრედიტირებულნი უნდა იყვნენ სახელმწიფოს მიერ და მათთან ოფიციალურად უნდა თანამშრომლობდნენ სოციალური მუშაკები. 

აღნიშნული პროექტი შეეხებათ როგორც იტალიის მოქალაქე ქალბატონებს, ასევე იმ უცხოელებს, რომელთაც იტალიაში ბინადრობის უფლება აქვთ. გარდა ამისა, პროგრამით შეუძლიათ ისარგებლონ იმ უცხოელმა ქალბატონებმაც, ვისაც დევნილის სტატუსი აქვთ მინიჭებული, ძალადობის მოტივით. 

დახმარებაზე განაცხადის გაკეთება შესაძლებელია მერიაში/ადგილობრივ მუნიციპალურ ორგანოში. 

ნინა მამუკაძე