იტალია სამი დოზით აცრილებისთვის უვადო Green Pass-ს განიხილავს

იტალიის მინისტრთა საბჭო ოთხშაბათს, სამი დოზით ვაქცინირების შემთხვევაში, Green pass-ის ხანგრძლივობის ცვლილებას განიხილავს.

დღის წესრიგში დადგა საკითხი, რომელიც  მწვანე სერტიფიკატის შეუზღუდავ ხანგრძლივობას ითვალისწინებს, თუმცა, გათვალისწინებული იქნება ვაქცინის ეფექტურობის სტატისტიკა და "ემასა" და "აიფას" მოსაზრება შესაძლო მეოთხე დოზის შესახებ.

რაც შეეხება სხვა სიახლეებს, შეგახსენებთ, რომ რომ იტალიის მინისტრთა საბჭომ, ღია სივრცეში ნიღბის ტარების ვალდებულება მხოლოდ 10 თებერვლამდე გადაავადა.

სამშაბათიდან, პირველი თებერვლიდან, ახალი რეგულაცია ამოქმედდა:

საჯარო თუ კერძო სექტორში დასაქმებულმა პირებმა, რომლებსაც შეუსრულდათ 50 წელი, უნდა აიცრან პირველი დოზით მაინც, რადგან super Green pass-ის გარეშე, 2022 წლის 15 თებერვლიდან ვეღარ შეძლებენ სამსახურში გამოცხადებას, 2022 წლის 15 ივნისამდე.

ასევე უნდა გაითვალისწინოთ, რომ საბაზისო Green Pass-ი, რომელიც გულისხმობს მხოლოდ კოვიდტესტის პასუხს, საჭირო იქნება შემდეგ ორგანიზაციებში: საჯარო ოფისები, საემიგრაციო სამსახურები, ფოსტა და ბანკები, სავაჭრო ცენტრები, კომერციული დაწესებულებები, რომლებიც არ წარმოადგენენ ადამიანისთვის სასიცოცხლოდ მნიშვნელოვან ობიექტებს. აქ იგულისხმება, რომ მაგალითად, აფთიაქებში, სურსათის მაღაზიებსა და სუპერმარკეტებში მომსახურების მისაღებად, არანაირი Green Pass სავალდებულო არ იქნება.