იტალიაში ფემინიციდი ისევ დიდ პრობლემად რჩება

იტალიაში, 2021 წლის დასაწყისიდან დღემდე, ფემინიციდის 103 შემთხვევა დაფიქსირდა. ეს ნიშნავს იმას, რომ ყოველ მესამე დღეს, ქვეყანაში ერთ ქალს კლავდნენ.

ძირითად შემთხვევაში, ქალები იცნობდნენ თავიანთ მკვლელებს. შემთხვევების 72.3% აქტუალური, ან ყოფილი პარტნიორის მიერ არის ჩადენილი. თუ ამ რიცხვს დავუმატებთ იმ შემთხვევებსაც, როდესაც ქალი საკუთარი ოჯახის წევრმა მოკლა, მაშინ პროცენტი 82.3-მდე გაიზრდება.

ფემინიციდის ჩამდენთა დიდი უმრავლესობა (76,4%) იტალიელია, ხოლო დანარჩენი სხვადასხვა ეროვნების წარმომადგენლები არიან. აქედან 47.4%-ს სტაბილური სამსახური ჰქონდა. მათგან ნარკოდამოკიდებული მხოლოდ 15% იყო.

აღნიშნულ მონაცემებს, ქალთა მიმართ ძალადობის წინააღმდეგ მებრძოლი ორგანიზაციები ავრცელებენ. მთელი ქვეყნის მასშტაბით სულ ფუნქციონირებს 84 ცენტრი, 111 ორგანიზაციითა და 60 თავშესაფრით, 19 რეგიონში. 2020 წელს ასეთ თავშესაფრებში 20 ათასი ქალი ცხოვრობდა. ეს რიცხვი წელს ოდნავ შემცირებულია.

კრიტიკას ვერ უძლებს ის ფაქტი, რომ ძალადობის წინააღმდეგ ბრძოლის სახელმწიფო პროგრამას ვადა, 2020 წელს გაუვიდა და ახალი პროგრამა ჯერ არ დამტკიცებულა. ეს კი ნიშნავს იმას, რომ გარდა ფონდებთან წვდომის შეზღუდვისა, ორგანიზაციებს კონკრეტულ სიტუაციებში ჩარევისასაც დაბრკოლებები ექმნებათ. სწორედ ამიტომ, აღნიშნული ორგანიზაციები 27 ნოემბერს დიდ მანიფესტაციას გეგმავენ, რომელიც დიდი ალბათობით რომში გაიმართება.