იტალიაში Green pass-ის გარეშე საზოგადოებრივი ტრანსპორტის ბილეთსაც ვეღარ იყიდით?!

მოგეხსენებათ 6 დეკემბრიდან იტალიაში Green pass-თან დაკავშირებული ახალი რეგულაციები ამოქმედდა. პირველივე დღეს, პოლიციის მიერ, 119 539 ადამიანი შემოწმდა. საშვის არქონის გამო დაჯარიმდა - 937, ხოლო ნიღბის არქონის გამო -  2 077 ადამიანი.

შინაგან საქმეთა სამინისტროს მონაცემებით, წინა კვირასთან შედარებით, ჯარიმების რაოდენობა გაორმაგებულია.

პირველი დღის კონტროლის შედეგების წარდგენის შემდეგ, შინაგან საქმეთა მინისტრმა, ლუჩანა ლამორჯეზემ განაცხადა, რომ პოლიცია ლმობიერი ვერ იქნება. "ზოგიერთი მედია მაუწყებლის აზრით, არ ვართ საკმარისად მკაცრები, რაც სიმართლეს არ შეესაბამება. ჩვენი არჩევანია სიმკაცრე! რათა გარანტირებული იყოს მოსახლეობის ჯანმრთელობა", ამბობს მინისტრი.

ტრანსპორტის სამინისტრო მუშაობს გეგმაზე, რომლის მიხედვითაც, მომავალში საზოგადოებრივი ტრანსპორტის ბილეთის ყიდვა მხოლოდ “Green Pass”- ის მქონე პირები შეძლებენ, როგორც ეს სათხილამურო ბილეთების შემთხვევაშია. „ჩვენ შევისწავლით მექანიზმებს. გარემოებები ხელს გვიწყობს და ოპტიმისტურად ვართ განწყობილი, რომ უკვე მომდევნო კვირიდან შევძლებთ ექსპერიმენტის დაწყებას,“ განაცხადა პრესასთან საუბრისას მინისტრმა ენრიკო ჯოვანინიმ.

პაატა ქურთიაშვილი