იტალიაში მცხოვრები ქართველი მომღერალი და მსახიობი ლუკა ჩიქოვანი, უკრაინაში გაემგზავრა

იტალიაში მცხოვრები წარმატებული ქართველი მომღერალი და მსახიობი ლუკა ჩიქოვანი, ჰუმანიტარული მისიით უკრაინაში გაემგზავრა. ლუკა რუსეთ-უკრაინის ომის დაწყებიდან მალევე ჩაერთო უკრაინის დასახმარებლად წამოწყებული ჰუმანიტარული დახმარების აქტივობებში. დღეს კი პირადად გაემგზავრა, რათა საავადმყოფოს, სადაც დახმარება დღემდე ვერ ჩავიდა, პირადად ჩაუტანოს ჰუმანიტარული დახმარება:

"ჩვენ დღეს უკრაინაში მივდივართ, ორი კვირის წინ დამიკავშირდა უკრაინის კოროსტენის ცენტრალური საქალაქო საავადმყოფოს მთავარი ექიმი. აღნიშნული საავადმყოფო ომის ხაზთან მდებარეობს. მან მითხრა, რომ მათი ჰოსპიტალი ჰუმანიტარულ დახმარებებს ვერ იღებდა, ომის ხაზთან სიახლოვის გამო. დაასახელა კიდევ ერთი პრობლემა, უკრაინაში მიმავალ ჰუმანიტარულ ტვირთში ყუთები არეულია ხოლმე და სამედიცინო მარაგი არასოდეს აღწევს კოროსტენის საავადმყოფომდე. ამიტომ მთხოვა პირადად ჩამეტანა კონკრეტული მარაგი.

ფრანჩესკოსთან ერთად, რომელიც ჩემი ტურის მენეჯერი იყო ფილმ Happy As Lazzaro-ს სარეკლამო ტურის დროს, ბოლო 2 კვირის განმავლობაში შევაგროვეთ სამედიცინო დანიშნულების ტვირთი და ვიშოვეთ მინი ავტობუსი.  გვაქვს ასევე ოფიციალური წერილი უკრაინის საკონსულოდან, ამ მარაგის უკრაინაში შეტანის შესახებ. ხვალ საღამოს საზღვართან ვიქნებით. მადლობა იმ ადამიანებს, ვინც მხარი დაუჭირა ამ ინიციატივას," - აცხადებს ლუკა ჩიქოვანი.