იტალიაში სექტის წევრები დააკავეს, რომლებსაც თვეების მანძილზე ბავშვები ჰყავდათ დამწყვდეული

ლოცვასა და პატიების თხოვნაში გატარებული დღეები და ღამეები, ხშირად, მინიმალური საკვების ამარა; მათ სახლიდან გასვლა აკრძალული ჰქონდათ; არ ჰქონდათ ტელევიზორის ყურებისა და ტელეფონების გამოყენების უფლება; არ ჰყავდათ მეგობრები და არ დადიოდნენ სკოლაში. საუბარია იტალიაში, ბოლცანოს ავტონომიური პროვინციის დასახლება კამპო ტურესში მცხოვრებ რამდენიმე არასრულწლოვანზე, რომლებიც ამ მდგომარეობაში საკუთარი დედების რელიგიური ფანატიზმის "წყალობით" აღმოჩნდნენ. ქალები მიეკუთვნებიან რელიგიურ სექტას "ახალი ქრისტიანები", მიმდინარეობას რომელსაც რომის ეკლესია არ აღიარებს.

პირველი, ვინც განგაში ატეხა, ბავშვების სკოლის დირექტორი იყო, რომელიც მას შემდეგ, რაც გაცდენებმა პერმანენტული ხასიათი მიიღო, სოციალურ მუშაკებს დაუკავშირდა. სოციალურმა სამსახურმა თავის მხრივ საქმის კურსში პოლიცია ჩააყენა და დაიწყო გამოძიება. გამოძიების საფუძველზე სააშკარაოზე გამოვიდა სექტის საქმიანობა და შუა საუკენეებში არსებული დასჯის სასტიკი მეთოდები. ბავშვები ისჯებოდნენ იმისთვისაც კი, თუ თანატოლის ტელეფონში ჩაიხედებოდნენ. ამის გამო მათ რამდენიმე ღამის განმავლობაში არ აძინებდნენ და გამოკეტილი ჰყავდათ ცარიელ ოთახში.

სამართალდამცველებმა დააკავეს სექტის ხუთი წევრი ქალი, ბავშვებისთვის იძულებით თავისუფლების აღკვეთისა და ცუდად მოპყრობის ბრალდებით. ხუთივე ქალი არის სექტის წევრი, რომლის ქურუმი და წინამძღვარიც შვეიცარიელი ბიშოპ შუერტია. ეს არის ფანატიკოსების ჯგუფი, რომლებიც ადამიანთა ცოდვების მოსანანიებლად, სასტიკ მეთოდებს მიმართავს.

პოლიციისათვის ყველაზე შოკის მომგვრელი აღმოჩნდა ის, რომ სექტის წევრები ამ ბავშვების დედა და დეიდა იყვნენ. ამჟამად, ბავშვები უსაფრთხოდ, სოციალური მუშაკების მეთვალყურეობის ქვეშ იმყოფებიან.