იტალიურმა უმსხვილესმა გამოცემამ, გავრცელებული დეზინფორმაციის გამო, ExclusiveTV-ს პროტესტის შემდეგ ბოდიში მოიხადა

რამდენიმე კვირის წინ, ჩვენს მკითხველს, ერთი ძალიან უსიამოვნო ფაქტის შესახებ მივაწოდეთ ინფორმაცია. საუბარია, იტალიის ყველაზე მსხვილ სპორტულ გამოცემა Stadio-Corriere dello sport-ში დაბეჭდილ სტატიაზე, რომელიც ხვიჩა კვარაცხელიას ეძღვნებოდა. სტატიაში მძიმე დეზინფორმაცია იყო გასული. კონკრეტულად კი, იკითხებოდა, რომ საქართველო არის "დიდი დედა რუსეთის ნაწილი, რომელიც ჯერ ისევ კრემლის ორბიტაზეა". 

ჩვენ სასწრაფოდ გავუგზავნეთ აღნიშნულ სპორტული გამოცემის რედაქციას წერილი, სადაც შესაძლებლობის ფარგლებში დეტალურად ავუხსენით, რომ საქართველოს რესპუბლიკა დამოუკიდებელი სახელმწიფოა, რომელმაც დამოუკიდებლობა 1991 წელს დაიბრუნა 70-წლიანი კომუნისტური წყობის შემდეგ. მიმდინარე წელს კი იტალიამ და საქართველომ დიპლომატიური ურთიერთობების 30 წლის იუბილე ოფიციალურად აღნიშნეს.

წინა სტატიაში შეგპირდით, რომ აუცილებლად მოგახსენებდით, თუ როგორ განვითარდებოდა მოვლენები და რა პასუხს გაგვცემდა, აღნიშნული სპორტული გამოცემის რედაქცია. გამომცემლობიდან ამომწურავი პასუხი მივიღეთ. თავდაპირველად, დირექტორმა ივან ძაძარონიმ გვიპასუხა:

• ელექტრონულ ფოსტაზე მოსული პასუხი დასათაურებული იყო, შემდეგნაირად: ბოდიში

ძვირფასო ნინა, ვწუხვარ. ძალიან სერიოზული შეცდომაა, რომელსაც ვიმედოვნებ, რომ მალე გამოვასწორებთ, რადგან კორესპონდენტის გაგზავნას ვაპირებთ საქართველოში კვარას შესახებ მასალის მოსამზადებლად. ვრჩები თქვენს განკარგულებაში.

ივან ძაძარონი

დირექტორი

• იმავე დღეს, ბატონმა ძაძარონიმ მოგვაწოდა სტატიის ავტორის, ანდრეა ანტონიოლის პასუხი რედაქტორისადმი, სადაც ჟურნალისტი დეტალურად ხსნის სიტუაციას. 

წერილიდან ჩანს, რომ ანტონიოლი შეწუხებულია შექმნილი უხერხული სიტუაციის და იმის გამო, რომ იმ ფორმით, რა ფორმითაც სტატია გაზეთში დაიბეჭდა, საქართველოს დისკრიმინაცია მოხდა, რაც სრულებით არ ყოფილა მისი მიზანი, პირიქით, ის დეტალურად განიხილავდა რუსეთის იმპერიალისტურ და დამპყრობლურ პოლიტიკას საქართველოს მიმართ, მაგრამ როგორც ირკვევა, სტამბაში გაშვებამდე, მასალის შემოკლება მოხდა, რამაც სტატიის აღნიშნული ნაწილის შინაარსი სრულიად ააცდინა ძირითად კონტექსტს, მოხდა ტექსტის არასწორად ინტერპრეტირება და გამოვიდა ისე, რომ საქართველო დღემდე კრემლის ორბიტაზე იმყოფება. ჟურნალისტი ბოდიშს იხდის, პასუხისმგებლობას საკუთარ თავზე იღებს და მზადყოფნას გამოთქვამს გაშვებული შეცდომის გამოსასწორებლად.

ExclusiveTV მადლობას უხდის Corriere Dello Sport-ის რედაქციას რეაგირების, დაშვებული შეცდომის აღიარებისა და გამოსწორების მზაობისთვის. იმედია, საჯარო სივრცეშიც მალე ვიხილავთ უკვე კორექტირებულ ინფორმაციას.

სტატია მოამზადა ნინა მამუკაძემ

იტალია/ფლორენცია

აგრეთვე დაგაინტერესებთ:

📌 ექსკლუზივი: ყველაზე მსხვილმა იტალიურმა სპორტულმა გამოცემამ Corriere dello Sport-მა, ხვიჩა კვარაცხელიას შესახებ დაწერილ სტატიაში საქართველო “დიდი დედა რუსეთის” ნაწილად მოიხსენია

📌 ხვიჩა კვარაცხელიამ, ემიგრაციაში დაგუბებული ქართველი ემიგრანტების უსასოობას წერტილი დაუსვა! - ხათუნა შარაძე

📌 ვინ არის ჯორჯა მელონი?!