რა შესაძლო საფრთხის წინაშე დააყენა ემიგრანტები, არჩევნებში მელონის გამარჯვებამ?!

"ეს არის პასუხისმგებლობის აღების დრო ათეულობით მილიონი მოქალაქის წინაშე. ჩვენ იტალიამ აგვირჩია და მას არ ვუღალატებთ. მადლობას ვუხდი ჩემს მოკავშირეებს. ჩვენ ვამაყობთ, რომ იტალიელები ვართ!" - ამის შესახებ ჟურნალისტებთან პირველი განცხადება, იტალიის ვადამდელ საპარლამენტო არჩევნებში გამარჯვებულმა კანდიდატმა, მემარჯვენე, ჯორჯა მელონიმ (Fratelli d'Italia) გააკეთა.

მელონის გამარჯვებას სოციალურ ქსელში ქართველი ემიგრანტების მხრიდან აზრთა სხვადასხვაობა მოჰყვა. ნაწილი მიიჩნევს, რომ პირველ რიგში, ჯორჯა მელონი იტალიიდან არალეგალი ემიგრანტების შევიწროებასა და “წმენდას” განახორციელებს. ნაწილის აზრით კი, პატიოსნად მომუშავე ემიგრანტებს საფრთხე არ ემუქრებათ და არ არის გამორიცხული, მათი კანონიერად მუშაობისთვის, იტალიაში ლეგალურად ყოფნის შესაძლებლობები გაჩნდეს.

წარმოადგენს თუ, არა საფრთხეს ქართველი ემიგრანტებისთვის იტალიის ვადამდელ საპარლამენტო არჩევნებში ჯორჯა მელონის გამარჯვება, რასაკვირველია, დღეს ამის პროგნოზირება რთულია. იტალიაში რამდენიმე წლის წინ ჩამოსული ემიგრანტები თვლიან, რომ მელონის ანტისიმპათია ემიგრანტების მიმართ მხოლოდ მათ ეხებათ, რომლებიც სახელმწიფო ბიუჯეტის ზიანს წარმოადგენენ. ისინი ვარაუდობენ, რომ იტალია ძველ დროს დაუბრუნდება და კანონი, იტალიაში ლეგალურად ცხოვრებისა და მუშაობის შესახებ, ყოველ წელს გამოვა. თუმცა, ემიგრანტი საზოგადოების ნაწილი ამ აზრსაც ოპონირებს. გამომდინარე იქიდან, რომ არჩევნებში გამარჯვებული პარტია, ქვეყანაში შემოსული მიგრანტების ლეგალურად ყოფნისთვის მიღებულ კანონს შეცდომად მიიჩნევს და ამ მიმართულებით, კანონების გამკაცრებას გეგმავს, ემიგრანტები არალეგალების “წმენდასთან” დაკავშირებით სერიოზული პროცესების დაწყებას ვარაუდობენ.  თავად, იტალიელი მოსახლეობის უმრავლესობა კი არჩევნებში გამარჯვებულებს, ფაშისტებად მოიხსენიებს.

საბოლოო ჯამში კი, ყველაფერი მელონის დემოკრატიაზეა დამოკიდებული, თუ რამდენად ლოიალური ან, მკაცრი იქნება და რა პროცესებს განახორციელებს ემიგრანტებისთვის, რომლებიც იტალიაში “იაფ მუშა ხელად” ითვლებიან.

შეგახსენებთ, რომ გუშინ იტალიაში ვადამდელი საპარლამენტო არჩევნები ჩატარდა. როგორც პრეზიდენტმა, სერჯიო მატარელამ განაცხადა, სამთავრობო კრიზისმა იტალიის უკვე ყოფილი პრემიერ-მინისტრის, მარიო დრაგის გადადგომა გამოიწვია.

თავდაპირველად პრეზიდენტი პრემიერ დრაგის გადადგომის წინააღმდეგი იყო და შესაბამის დოკუმენტს ხელს არ აწერდა. მატარელა დრაგის გადადგომას მას შემდეგ დაეთანხმა, რაც მოქმედ პრემიერს კოალიციის სამი პარტიის მხარდაჭერა მოაკლდა. პრეზიდენტის მიერ პარლამენტის დათხოვნის შემდეგ,  ვადამდელი საპარლამენტო არჩევნები 25 სექტემბერს ჩატარდა, სადაც მემარჯვენე ჯორჯა მელონიმ, Fratelli d'Italia-მ გაიმარჯვა. ულტრამემარჯვენე პარტიათა ალიანსს, ანუ, ჯორჯა მელონის, მატეო სალვინის, სილვიო ბერლუსკონის და მაურიციო ლუპის პარტიებს, ჯამში, ხმების 44% აქვს მიღებული. 

ავტორი: მზეკო ჟვანია. იტალია/რომი

აგრეთვე დაგაინტერესებთ:

📌 იტალიამ ახალ პოლიტიკურ რეალობაში გაიღვიძა - ვინ გაიმარჯვა ვადამდელ არჩევნებში?!

📌 “ახალი პაპის” ქართველი მცველი - ექსკლუზიური ინტერვიუ ზურა მჭედლიძესთან

📌 თაღლითური სქემები იტალიაში - ლია გვიჩიანი ქართველ დამსაქმებლებს ამხელს!

📌 ვინ არის ამერიკული ჟურნალის გარეკანზე მოხვედრილი ქართველი ემიგრანტი?!