რიგში მდგომი რამდენიმე ადამიანი, ერთდროულად გაიწია და პატივისცემის ნიშნად, ქართველებს გზა დაუთმეს - ExclusiveTV-ის რეპორტაჟი ემპოლი-ნაპოლის მატჩიდან

გუშინ "ნაპოლი", "ემპოლის" შეხვდა, ისევ მოიგო (რა თქმა უნდა)… ხვიჩა ძირითადში იყო… 
მატჩის დაწყებამდე, სტადიონის გარეთ ინტერვიუებს ვწერდი, როცა რაღაც მომენტში, ქართველების პატარა ჯგუფი გამოჩნდა, მხრებზე ქართული დროშებით და ხვიჩას მაისურებით და დროშებით… ამაყები, ლაღები.

მაშინვე ობიექტივი მათკენ მივაბრუნე… მშვიდად ჩადგნენ გრძელ რიგში, მაგრამ უცებ მართლა საოცრება მოხდა (თუ რატომ საოცრება, ამას ქართველი ემიგრანტები კარგად მიხვდებიან). რიგში მდგომი რამდენიმე ადამიანი,
ერთდროულად გაიწია და პატივისცემის ნიშნად, გზა დაუთმეს ქართველებს.

ცრემლის შემშრალება და ემოციების მოთოკვა მომიწია, მივხვდი, რომ თუ ამ განწყობით გავაგრძელებდი მუშაობას, ძალიან სუბიექტური ვიქნებოდი. თუმცა, ვფიქრობ, როცა ევროპის და მსოფლიო დონეზე უწევს ქართველს თამაში, მეტ-ნაკლებად, ყველა ქართველი ჟურნალისტი სუბიექტურია და ამის მიზეზი კარგად ვიცით. ერთი ქართველის წარმატებას, საკუთარ, საქართველოს წარმატებასთან ვაიგივებთ.

მალევე ჟურნალისტების ტრიბუნაზე გადავინაცვლე. სადაც ისევ სიურპრიზი მელოდა. მასპინძელი გუნდის პრესცენტრის უფროსი, რომელთანაც მანამდე მხოლოდ მეილის საშუალებით მქონდა კონტაქტი, პირდაპირ მოვიდა, გულისხმიერად მომიკითხა და ჩამეკითხა, რაიმე ხომ არ მჭირდებოდა.

ისევ ლირიკული გადახვევა გამომივიდა, მაგრამ მინდა თქცვენც , ქართველმა გულშემატკივრებმაც იგრძნოთ იტალილების, თანაც არამხოლოდ ნეაპოლელების განწყობა ქართველების მიმართ მას შემდეგ, რაც იტალია ქართველმა კვარაცხელიამ "დაიპყრო". აქვე მინდა აღვნიშნო, რომ "ემპოლის" პრესცენტრის უფროსმა, ძალიან თბილად მოიხსენია ლევან მჭედლიძე, რომელიც წლების განმავლობაში თამაშობდა ამ კლუბში. 

"ნაპოლის" მოგება უკვე ტრადიციად იქცა, მაგრამ მიუხედავად ამისა, აშკარაა, რომ არც ლუჩანო სპალეტი და არც ფეხბურთელები, არცერთ მატჩს მსუბუქად არ უდგებიან, თუნდაც ეს კლასიფიკაციაში ბოლო ადგილებზე მყოფი გუნდი იყოს, რადგან, როგორც იტალიელები იტყვიან ხოლმე, ბურთი მრგვალია...

"ნაპოლმა" ძორითადი შემადგენლობით მერეტი, დი ლორენცო, რაჰმანი, მინ ჯე, მარიო რუი, ანგისა, ლობოტკა, ზიელენსკი, ლოზანო, კვარაცხელია, ოსიმენი, მატჩის ბედი პირველივე ტაიმში გადაწყვიტა, ორქულიანი უპირატესობით. პირველი - (ავტოგოლი) მეჩვიდმეტე წუთზე, ხოლო მეორე გოლი 28-ე წუთზე გავიდა, ოსიმენის ავტორობით. მიუხედავად იმისა, რომ აღნიშნული მატჩი ერთი შეხედვით ხვიჩასთვის ასე ვთქვათ, საუკეთესო არ ყოფილა, მან მაინც გადამწყვეტი როლი შეასრულა, ორივე გოლი, თამამად შეგვიძლია ვთქვათ, რომ ქართველი ფეხბურთელის უშუალო ჩართულობით გავიდა.

მიუხედავად, იმისა, რომ 67-ე წუთზე მსაჯმა მარიო რუის მინდორი დაატოვებინა და "ნაპოლის" 10 კაცით მოუწია თამაშის გაგრძელება, ამას მატჩის ანგარიშზე არ უმოქმედია. მატჩი 0-2 დასრულდა "ნაპოლის" სასარგებლოდ.

კვარაცხელია Whoscored.com-მა 6.6, ხოლო Sofascore.com-მა 7.0 ქულით შეაფასა. შემდეგ მატჩს "ნაპოლი" 3 მარტს სახლში, ლაციოს წინააღმდეგ ითამაშებს. 

ნინა მამუკაძე

სპეციალურად იტალიიდან