როგორ შეგიძლიათ მიიღოთ პენსია იტალიაში და რა არის ამისთვის საჭირო?!

ამჯერად, ვისაუბრებთ იმ ტიპის პენსიაზე, რომელზეც ყველაზე მეტად აქვთ წვდომა ქართველ ემიგრანტებს, ეს არის სოციალური პენსია.

სოციალური პენსია ეს არის იგივე სოციალური დახმარება, რომელსაც იტალიის სახელმწიფო უზრუნველყოფს სიღარიბის ზღვარზე მყოფი მოქალაქეებისთვის, რომლებმაც მიაღწიეს 67 წლის ასაკს და რომლებსაც აქვთ შემოსავლისა და საცხოვრებელი პირობების რეკვიზიტები განაცხადის გასაკეთებლად აღნიშნული დახმარების მისაღებად.

მაშ ასე, რა არის საჭირო იმისთვის, რომ სოციალურ პენსიაზე წვდომა მიიღოთ?

• პირველი, ეს არის შემოსავლების რეკვიზიტი. იმისთვის, რომ სოციალური პენსია დაგენიშნოთ, თქვენი წლიური შემოსავალი არ უნდა აღემატებოდეს 5.983 ევროს.
• ასევე აუცილებელია გრძელვადიანი ბინადრობის ნებართვის საბუთი.
• უნდა გქონდეთ 10 წლიანი მუდმივი ჩაწერა იტალიაში, შესაბამისად იტალიური პირადობის მოწმობაც.

სოციალური პენსიის სრული თანხა, ანუ მაქსიმუმი შეადგენს 460 ევროს (თუ განმცხადებელს შემოსავლები არ უფიქსირდება), დამატებული ასევე მეცამეტე, დეკემბრის თვეც.თუ პირს გარკვეული ტიპის შემოსავალი მაინც უფიქსირდება, თვიური თანხის ოდენობა კლებულობს.

აღსანიშნავია, რომ სოციალურ პენსიასთან ერთად, შეგიძლიათ მოითხოვოთ სხვადასხვა სახის სოციალური დახმარებები, რასაც იტალიის სახელმწიფო გვთავაზობს.

არის თუ არა იმის საშიშროება, რომ ერთხელ დანიშნული პენსია, რაღაც ეტაპზე, შეჩერდეს, ან გაუქმდეს?

დიახ, ეს შესაძლებელია. სოციალური პენსია შეიძლება შეჩერდეს, ან გაუქმდეს თუ თქვენ წლიური შემოსავალი იმაზე მეტი დაგიფიქსირდათ, ვიდრე ამას კანონი ითვალისწინებს. ასევე უნდა გაითვალისწინოთ, რომ იტალიის საზღვრის გარეთ ყოფნა, არ უნდა აღემატებოდეს 29 დღეს, წინააღმდეგ შემთხვევაში შესაძლოა პენსიის შეჩერება მოხდეს რაც აღდგენადია.

სოციალური პენსიის მისაღებად, განაცხადი კეთდება INPS-ში (სოციალური უზრუნველყოფის ეროვნული სამსახური), ელექტრონული ფოპსტის PEC-ის საშუალებით. განაცხადის გასაკეთებლად დახმარებისთვის შეგიძლიათ მიმართოთ პროფკავშირების სამსახურებს და ფისკალური დახმარების ცენტრებს, იგივე CAF-ებს.

მაკა ხაჩოშვილი სპეციალურად ExclusiveTV-თვის ნეაპოლიდან