თუ იტალიაში ცხოვრობთ და ხართ ძალადობის მსხვერპლი, დარეკეთ ნომერზე - 1522

1522 - ეს არის ქალთა მიმართ ძალადობის წინააღმდეგ ბრძოლის ცხელი ხაზი.

ქალთა მიმართ ძალადობის წინააღმდეგ ბრძოლის საერთაშორისო დღესთან დაკავშირებით, დღეიდან თვის ბოლომდე, იტალიაში არსებული ერთ-ერთი ყველაზე დიდი სუპერმარკეტების ქსელი „Coop  alleanza 3.0“, მთელი ქვეყნის მასშტაბით, თავის 360 სავაჭრო პუნქტის ჩეკზე დაიტანს წარწერას - „თუ ხარ ძალადობის მსხვერპლი, დარეკე სადღეღამისო ნომერზე 1522“.

„გზა ქალისა და მამაკაცის თანასწორობის მიღწევამდე, ჯერ კიდევ ძალიან გრძელია და ქალების მიმართ ძალადობის ფაქტები, სამწუხაროდ, უფრო და უფრო მატულობს, რასაც სტატისტიკა ამტკიცებს. ამიტომ პოლიტიკაში ისეთი ფიგურების მოსვლაა საჭირო, ვისთვისაც ეს თემა უცხო არ იქნება, მასზე წლები აქვს ნამუშევარი და რეალური ნაბიჯების გადადგმა შეუძლია, პრობლემის მოგვარების გზაზე. ასევე, სუპერმარკეტების ქსელის ეს ინიციატივაც, სწორედ ამ კუთხით ცნობიერების ამაღლებას ემსახურება“, განაცხადა პრესასთან მოძრაობის ერთ-ერთმა აქტივისტმა.

ხშირად, ძალადობის ფაქტები, სავალალოდ მთავრდება. შეგახსენებთ, რომ იტალიაში, 2021 წლის დასაწყისიდან დღემდე, ფემინიციდის 103 შემთხვევა დაფიქსირდა. ეს ნიშნავს იმას, რომ ყოველ მესამე დღეს, ქვეყანაში ერთ ქალს კლავდნენ. ძირითად შემთხვევაში, ქალები იცნობდნენ თავიანთ მკვლელებს. შემთხვევების 72.3% აქტუალური, ან ყოფილი პარტნიორის მიერ არის ჩადენილი. თუ ამ რიცხვს დავუმატებთ იმ შემთხვევებსაც, როდესაც ქალი საკუთარი ოჯახის წევრმა მოკლა, მაშინ პროცენტი 82.3-მდე გაიზრდება.