ვინ არის იტალიელი, რომელიც ასაცრელად, სილიკონის ხელით გამოცხადდა

იტალიელი შუახნის მამაკაცის ამბავი, რომელიც ასაცრელ პუნქტში სილიკონის ხელით მივიდა, მთელ მსოფლიოს ელვის სისწრაფით მოედო. სოციალურ ქსელებში მას ათასობით პოსტი მიეძღვნა, ზოგი უწონებდა მცდელობას, ზოგიც სასტიკად კიცხავდა, რადგან არ შეიძლება ასე მოქცევა მაშინ, როდესაც კოვიდით ყოველდღიურად ათასობით ადამიანი იღუპება.

მაგრამ 56 წლის პიემონტელი მამაკაცის განზრახვა, საკმაოდ პრაგმატული იყო. მოგეხსენებათ, იტალიაში 15 ოქტომბრიდან Green pass-ი სავალდებულოა ყველა იმ პირისთვის, ვინც დასაქმებულია, არ აქვს მნიშვნელობა, კერძო სექტორი იქნება ეს, თუ საჯარო. აღნიშნულმა პიროვნებამ ამ ხერხს მხოლოდ და მხოლოდ მწვანე საშვის მისაღებად მიმართა. მას ვაქცინის გაკეთება არ სურს, მაგრამ საკუთარი სტომატოლოგიური კლინიკის თავიდან გახსნა უნდა, რომელიც უკვე ორი თვეა სწორედ Green pass-ის არ ქონის გამო, დაკეტილი აქვს.

დიახ, პიემონტელი მამაკაცი თავადაც ექიმი გახლავთ, მეტიც, ის ექიმების ოჯახიდანაა და მისი მამა რეგიონში წლების განმავლობაში იმ სამედიცინო უწყებაში მუშაობა, რომელიც ახლა ვაქცინაციის კამპანიას ახორციელებს.

შეგახსენებთ, რომ 2 დეკემბერს იტალიაში, ქალაქ ბიელაში (პიემონტე) 56 წლის მამაკაცი ასაცრელად, სილიკონის ხელით გამოცხადდა. ამ ხერხს მან მხოლოდ Green pass-ის მისაღებად მიმართა, მაგრამ მას შემდეგ, რაც შეატყო რომ მიუხვდნენ საქციელს, ექთანს სთხოვა, თვალი დაეხუჭა ამ ყველაფერზე. მაგრამ თვალის დახუჭვაზე საუბარიც არ იყო. მეტიც, მამაკაცის წინააღმდეგ პროკურატურაში საქმე აღიძრა.