ხომ შეიძლება მასაც ვეზედმეტო დედამიწაზე .... და მართლა თოვლივით დამამთავროს ?! - დინა მირცხულავა

ხომ შეიძლება მასაც ვეზედმეტო დედამიწაზე .... და მართლა თოვლივით დამამთავროს ?! -  წერს სოციალურ ქსელში საფრანგეთში მცხოვრები მწერალი დინა მირცხულავა.

„გადაებმება თოვლიანი დღეები ერთმანეთს და ყინვასავით წამიდგება ხოლმე თითებში თოვა ...

ასე მგონია, ბოლოს მომიღებს მოგონებები, ბოლო ფიფქამდე ვითოვლებ და მეც დავმთავრდები...

მაშინაც იდგა დღეები თოვლიანი.

და ჩვენ გვიყვარდა თოვლი

მეც მიყვარდი შენ

და არ მტკიოდა თოვა.

ფეხქვეშ ვაჭრაჭუნებდით თოვლს და მივაბიჯებდით თეთრ ორღობეში.

მახსოვს, ვიღაც გამოჩნდა გზაზე და დავემალეთ.

რომელიღაცა სახლის კედელს ავეკარით.

თვალდახუჭული ვიპოვნი ახლაც წლების მერეც იმ კედელს.

დავემალეთ, რომ არ ვეცნეთ, იმიტომ რომ ჩვენ ყოველთვის ვემალებოდით ყველას.

ვემალებოდით, იმიტომ რომ ყველას ვეზედმეტებოდით ჩვენ.

იმიტომ ვეზედმეტებოდით, რომ მეტნი ვიყავით მათზეც, თოვლზეც და იმ ღამეზეც მეტნი.

ანაზდად მოწყდა სახურავიდან თოვლი და დაგვმარხა.

დაგვმალა.

ბუნება ყოველთვის იყო ჩვენიანი, მხოლოდ ადამიანები დააბოტეებდნენ ჩვენზე, ისე როგორც თოვლზე დადიან ხოლმე დაურიდებლად.

და აი, დღეს, მე ისევ მტკივა თოვა, თითქოს ისევ იმ კედელთან ვიყო თოვლში დამარხული და ახლა ჩემი დაულაგებელი ცხოვრების ორღობეში რომ მოაბიჯებს იმ ადამიანს ვემალებოდე - სხვა ადამიანს.

მეშინია.

ხომ შეიძლება მასაც ვეზედმეტო დედამიწაზე....

და მართლა თოვლივით დამამთავროს?!“

წერს დინა მირცხულავა.

ნახატი: ირაკლიკუნჭულია

ასევე საინტერესოა:

🔵 რა დაგიჯდებათ საახალწლო სუფრა - ეს საინტერესოა!

🔵 "ეს იყო შოკი, სამჯერ ზედიზედ მოვუსმინე ვიდეოს და მაინც არ მჯეროდა" - სანდრა რულოვსი მიხეილ სააკაშვილის და ლიზა იასკოს ქორწინების შესახებ

🔵 რამდენი ლარი ეღირება 28 დეკემბერს ერთი ამერიკული დოლარი, ევრო, ბრიტანული გირვანქა და თურქული ლირა?