როდის იყო კაცები ასე ჩუმად მიდიოდნენ საყვარელი ქალისგან?! - ემიგრანტი საფრანგეთიდან

საფრანგეთში მცხოვრები, ემიგრანტი, მწერალი დიანა მირცხულავა, სოციალურ ქსელში წერს:

„პატარა ოთახში, სადაც ორი მკვდარი სული ვცხოვრობდით, ერთადერთი ცოცხალი არსება ხავერდის ფოთლებიანი ქოთნის ია იყო. საღამოობით ხელმოცარული, მეასე ხარისხოვან როლებს ვერ გაცდენილი - ქმარი ბრუნდებოდა.

ტოვებდა ასევე ხელმოცარულ მსახიობებს, ქალაქის რომელიღაც მიწისქვეშა სასადილოს ღარიბ სუფრასთან და სახლში მწნილისა და ღვინის სუნი მოჰქონდა.

მეცოდებოდა ეს საცოდავობა. ნაქირავებ ბინაში ერთადერთ ნორმალურ ავეჯზე - დივანზე ჩამოჯდებოდა და მელოდებოდა, რას ვეტყოდი. ტირილამდე მივყავდი ამ სურათს.გასაქცევად გამზადებული სტუმარივით იჯდა.

- არ გაიხდი ? - ვჯობნიდი თავს და მახარებდა, რომ ჯერ კიდევ ადამიანი ვიყავი, რომელსაც თანაგრძნობა შეეძლო.

- მეც მიყვარხარ. 

- (ცინიკოსი!) თავაუღებლად მიმარცვლავდა და თასმებს იხსნიდა დრაგუნა ბათინკებზე. ასეთი უგემოვნო ბათინკები მხოლოდ ხელმოცარულ და უბედურ მსახიობებს, მწერლებსა და მუსიკოსებს აცვიათ. არ მიყვარდა ეს კაცი, მაგრამ სიბრალული უფრო დიდი გრძნობა ყოფილა, ვიდრე სიყვარული.

-არასრულფასოვანების კომპლექსი გაქვს და იმიტომ სვამ ამდენს.

- ხმას ვუწევდი და ესეც მიხაროდა, რომ ძალა მქონია, ის ძალა, რომელსაც წლების მანძილზე დაჟინებით მოითხოვდნენ ჩემგან მეგობრები და კეთილის მსურველები.

- არ გავიხადო?

- დივნიდან ადგა და მომიახლოვდა.

-არა.(რა ძალა მქონია !) -პირიქით, სრულფასოვანების კომპლექსი მაქვს და იმიტომ ვსვამ - საწვიმარი მოხსნა საკიდიდან და კარები ფრთხლად მიიხურა.

როდის იყო კაცები ასე ჩუმად მიდიოდნენ საყვარელი ქალისგან?! მეკიდა მაგის სრულფასოვნება. იას დავავლე ხელი და ქუჩაში გამოვედი. წვიმდა. დეკემბრის შუა იდგა. იმ სახლში აღარ მივბრუნებულვარ. რამდენიმე დღეში იას ხავერდის ფოთლები გაუფერულდა და საბოლოოდ მოკვდა, ისე თითქოს ზაფხულის მზეს მოეგუდოს სიცხისგან. მას შემდეგ მხოლოდ ერთხელ ვნახე ხელმოცარული საცოდაობა. ახლოს არ მივსულვარ. ღვინის დაღმართს მოუყვებოდა და არც ერთ გუბეს არ აცილებდა ფეხს.

სრულფასოვანი კაცი, ერთადერთი სრულფასოვანი კაცი ჩემს ცხოვრებაში, რომელმაც ისე მშვიდად და წყნარად შეძლო წასვლა, რომ მხოლოდ ია მომკვდარიყო. ისეთებს კი რა დალევს, წასვლისას შენ რომ გკლავენ.“ - წერს ფეისბუკის საკუთარ გვერდზე მწერალი დიანა მირცხულავა.

ასევე საინტერესოა:

🔵 როდემდე გვყავდეს მიცვალებული მორგში - პოლონეთში ავარიით დაღუპული 30 წლის ქართველი ბიჭის გადმოსვენებას ოჯახი ვერ ახერხებს

🔵 გაეთრიეთ აქედან თქვენი გაფართოებით, ნამდვილი აგრესორები ხართ - პუტინის მიმართვა NATO-ს

🔵 პრეზიდენტის ძალისხმევა განსაკუთრებით მნიშვნელოვანია ქვეყნისთვის კრიტიკულ დროს - კელი დეგნანი