არჩილ გორდულაძე: 2011 წლიდან მოყოლებული ცდილობენ პრორუსობა დააბრალონ „ქართული ოცნების“ 41 000-ზე მეტ წევრს და 1 120 000-ზე მეტ მხარდამჭერს - როდესაც არაფერი გაქვს სათქმელი, კონკრეტულ ადამიანებს უნდა დააბრალო, რომ არიან მტრები

დადასტურებული ფაქტია, რომ „დიფ სთეითი" ებრძოდა და ებრძვის დონალდ ტრამპს, პრეზიდენტს, რომელიც არ აწყობს „დიფ სთეითს", რომელსაც ბრძოლა აქვს გამოცხადებული ამ ძალებთან და მარტივად მიიღეს გადაწყვეტილება, პრორუსის იარლიყი მიაწებეს და შემდეგ მასვე მოსთხოვეს, რომ თავი ემართლებინა, - განაცხადა პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ, ოპოზიციის პროპაგანდის შესახებ საუბრისას.

მისი თქმით, მსგავსი შემთხვევები მოხდა ევროპის რიგ ქვეყნებში, ასევე, საქართველოში, 2011 წლიდან, ოპონენტები ცდილობენ, რომ „ქართული ოცნების" წევრებსა და მხარდამჭერებს, პრორუსის იარლიყი მიაკრან და ქვეყნის მტრებად წარმოაჩინონ, რასაც გორდულაძე გებელსისეულ და ბოლშევიკურ რიტორიკას ადარებს.

„ზუსტად იგივე მოხდა საფრანგეთში, გერმანიაში, მოლდოვაში, უნგრეთში და სერბეთშიც იგივე ხდება, საქართველოზე ხომ საერთოდ არ გვაქვს ლაპარაკი - 2011 წლიდან მოყოლებული, „ქართული ოცნების“ გუნდის საწინააღმდეგოდ ცდილობენ, რომ პრორუსობა დააბრალონ „ქართული ოცნების“ 41 000-ზე მეტ წევრს და 1 120 000-ზე მეტ მხარდამჭერს. ეს არის მარტივი ხელწერა: როდესაც არაფერი გაქვს სათქმელი, აუცილებელია არსებობდეს მტრის ხატი და ამ მტრის ხატიდან გამომდინარე, კონკრეტულ ადამიანებს უნდა დააბრალო, რომ არიან მტრები. გებელსისეული და ბოლშევიკური რიტორიკა, სამწუხაროდ, კვლავ არსებობს." - განაცხადა არჩილ გორდულაძემ.