"ერთ საათში დავრბუნდებიო და ველოდებოდი.... ვეღარ დაბრუნდა. მითხრეს, ჩქარობდა წასვლასო, ასე იყო მუდამ, როცა ვინმეს უჭირდა" - პილოტ ზაზა ლორიას მეუღლე

ვერტმფრენს, რომელმაც თეთრი არაგვის ხეობაში კატასტროფა განიცადა და ვარდნის შედეგად აფეთქდა, პილოტი ზაზა ლორია მართავდა.

ოჯახის წევრები იხსენებენ, რომ პილოტს მათთან სატელეფონო კონტაქტი ტრაგედიამდე ერთი საათით ადრე ჰქონდა.

ისინი აცხადებენ, რომ ზაზა ლორიას ადამიანების გადარჩენისა და ფრენის დიდი სტაჟი ჰქონდა და გამორიცხავენ, რომ ავიაკატასტროფა მისი მიზეზებით ყოფილიყო გამოწვეული.

ოჯახი ტრაგედიის მიზეზად უამინდობას ასახელებს.

"კონტაქტი ჰქონდა ტრაგედიამდე ერთი საათით ადრე.

ასეთი ამბავი მოხდა,  გადაიჩეხა ხალხიო და უნდა გამოვიყვანოო.

ერთ საათში დავრბუნდებიო და ველოდებოდი.

ვეღარ დაბრუნდა.

მითხრეს, ჩქარობდა წასვლასო, ასე იყო მუდამ, როცა ვინმეს უჭირდა.

ჩქარობდა, როცა ვინმეს სიცოცხლე უნდა გადაერჩინა და ბედნიერი იყო, როცა გადაარჩენდა, შედეგს დადებდა.

ყოველთვის ბედნიერი და ამაყი იყო ამით, როცა ვინმეს გადაარჩენდა -  აცხადებს გარდაცვლილი პილოტის მეუღლე.

35 წლიანი სტაჟის პილოტს არა ერთი ადამიანის სიცოცხლე აქვს გადარჩენილი. 

სასაზღვრო პოლიციის ვერტმფრენი, გუდაურთან, 29 ივლისს ჩამოვარდა. ვერტმფრენმა, რომლის დახმარებით ჩამოვარდნილი პარაპლანისტების სამაშველო ოპერაცია მიმდინარეობდა, მართვა დაკარგა.

შსს-ს ინფორმაციით, ბორტზე 8 ადამიანი იმყოფებოდა. ყველა მათგანი დაიღუპა.

დაშავებულია პარაპლანის ინსტრუქტორი, მასთან ერთად მყოფი უცხოელი ტურისტი კი გარდაცვლილია.

საჰაერო ტრანსპორტის ექსპლუატაციის წესების დარღვევის ფაქტზე გამოძიება საქართველოს სისხლის სამართლის კოდექსის 275-ე მუხლით მიმდინარეობს.

ასევე დაგაინტერესებთ:

* "პირველად რომ ლევან ჩოხელთან ერთად ვიფრინე, ზამთარი იყო, ხევსურეთი, ცუდი რელიეფი, წელამდე თოვლი, ვერტმფრენი ვერ დაჯდა და ჰაერში გააჩერეს" - მარიკა ბაკურაძე