"ეს დახვეწილი მწამებლები, თუ დაბრუნდებიან, სიახლე და ცვლილება მიხეილ სააკაშვილია?" - ირმა ჭკადუა

ადვოკატმა ირმა ჭკადუამ ტელეკომპანია იმედის ეთერში სააკაშვილის რეჟიმის დროს, 2010 წელს მომხდარი უმძიმესი ისტორია გაიხსენა.

მისი განცხადებით, მეგის ქარდავამ საფეხბურთო კლუბ "ზუგდიდის დინამოს" მწვრთნელს ბესო შეროზიას საკუთარი საფლავისთვის ორმო გაათხრევინა და ულტიმატუმი წაუყენა, თუ წააგებდა ბოლნისის "სიონთან" მატჩს, იმ საფლავში დამარხავდა.

ირმა ჭკადუას განცხადებით, შეროზია სიკვდილს მაშინ გადაურჩა, რადგან გუნდმა ბოლნისის "სიონთან" თამაში მოიგო.

"2010 "ზუგდიდის დინამო" ხვდებოდა ბოლნისის "სიონს".

ბოლნისს გულშემატკივრობდა დავით კირკიტაძე, რომელიც ამჟამად რუსთავის მერობისთვის იყრის კენჭს, ხოლო ზუგდიდის მხარეს იყო მეგის ქარდავა, რომელიც ახლა დაპატიმრებულია.

გეტყვით, რა გააკეთა მეგის ქარდავამ.

ზუგდიდის მწვრთნელი ბესო შეროზია, აიყვანა ზუგდიდის სასაფლაოზე, გაათხრევინა საფლავი და უთხრა, თქვენ თუ წააგებთ ესაა შენი საფლავიო.

ხოლო, იმიტომ, რომ ბოლნისის "სიონმა" წააგო, დავით კირკიტაძემ მსაჯებს საჯაროდ, ტელეკამერების წინ სცემა.

ამაზე იყო სიუჟეტები მომზადებული, თუმცა არ გვახსოვს ამისთვის დასჯილი ადამიანები", - განაცხადა ირმა ჭკადუამ.

ადვოკატი იმედოვნებს, რომ დღეს საზოგადოებას წესით არ უნდა გაუჭირდეს ჯანსაღი არჩევანის გაკეთება.

"წარმოიდგინეთ, რას გაგვიკეთებენ ეს დახვეწილი მწამებლები, თუ დაბრუნდებიან რევანშით? რომელი ჟურნალისტი ან არასამთავრობო ორგანიზაცია გაუძლებს იმ ზეწოლას, რომელსაც ყველა ერთად გავდიოდით მაშინ.

დღეს სიტყვის თავისუფლებას საფრთხე არ ემუქრება და მედიის წარმომადგენლები თავისუფლები ხართ, მაგრამ მათ ჰგონიათ, რომ "ნაცმოძრაობის" დაბრუნების შემთხვევაში ეს ყველაფერი ასე გაგრძელდება? სიახლე და ცვლილება მიხეილ სააკაშვილია?" - განაცხადა ირმა ჭკადუამ.