"ღმერთი ისე ნამდვილად არ მომკლავს, რომ ერთხელ, თავაწეულმა არ გავიარო გამარჯვებული ბათუმის ბულვარში" - მიხეილ სააკაშვილის წერილი ბათუმელებს

"საქართველოს გადარჩენისთვის ბრძოლაში უკან დასახევი ყველა გზა ჩახერგილია და სამშობლოს გადარჩენას ალტერნატივა არ აქვს!" - ამის შესახებ აღნიშნულია მიხეილ სააკაშვილის წერილში, სადაც იგი ბათუმელებს მიმართავს.

საქართველოს ყოფილი პრეზიდენტის წერილი, ბათუმში აჭარის მთავრობის სახლთან მიმდინარე აქციაზე წაიკითხეს.

"მოგესალმებით გამარჯვებულ ბათუმს!

მოგესალმებით კოალიციურ ერთობას!

ახლა საქართველოს გადარჩენისთვის ბრძოლაში უკან დასახევი ყველა გზა ჩახერგილია და სამშობლოს გადარჩენას ალტერნატივა არ აქვს!

ამიტომ ყველა უნდა გაერთიანდეს, ისინიც კი, ვინც აქამდე მიმდინარე პროცესებს თვალს გვერდიდან ადევნებდნენ.

თქვენ ივანიშვილი დიდი უპირატესობით უკვე დაამარცხეთ, რაც მთელმა საქართველომ და ყველა საერთაშორისო დამკვირვებელმა იცის.

ახლა ეს გამარჯვება ბოლომდე უნდა მივიყვანოთ!

თავისუფლების კვარტალი თქვენი მოგონილია, ესაა თქვენი ლამაზი, ამაყი თვითმყოფადი, დამოუკიდებელი განწყობის ქალაქი.

ახლა მთავარია, თავისუფლების კვარტლად მთელი საქართველო ვაქციოთ და ყველგან, სადაც თავისუფლებისთვის ვიბრძვით ისინი უნდა გავხსნათ!

აქაც, ციხესთან, თავისუფლების კვარტალმა უნდა გამიხსნას დილეგის კარი.

ღმერთი ისე ნამდვილად არ მომკლავს, რომ ერთხელ, თავაწეულმა არ გავიარო გამარჯვებული ბათუმის ბულვარში!

ბრძოლის დროშა, რომელსაც ახლა მაღლა ბათუმი წევს აღარასდროს უნდა დაეშვას!", - წერს მიხეილ სააკაშვილი წერილში.

ცნობისთვის, ბათუმში გაერთიანებული ოპოზიციის აქცია მიმდინარეობს. აქციის მონაწილეები, ადგილობრივი თვითმმართველობის არჩევნების მეორე ტურის შედეგებს, აპროტესტებენ. მათი მთავარი მოთხოვნაა, საქართველოს ყოფილი პრეზიდენტის, მიხეილ სააკაშვილის ციხიდან გათავისუფლება.

ასევე დაგაინტერესებთ:

🔵 "თუ ასე გააგრძელებთ, ქართველი ხალხი აიყვანს ტყვედ ბიძინა ივანიშვილს" - ლევან ხაბეიშვილი

🔵 "გადავდივართ ბრძოლის ახალ ეტაპზე" - რუსთავის ციხესთან სააკაშვილის მხარდამჭერი აქცია იმართება

🔵 "წინ პოსტსაარჩევნო რევოლუცია გვაქვს" - მიხეილ სააკაშვილის გზავნილი საზოგადოებას

🔵 "მირჩევნია, მიხეილ სააკაშვილთან ერთად საკანში ვიჯდე, მირჩევნია საერთოდ არ ვიყო ცოცხალი, ვიდრე ამ უნამუსობას ვუყურო" - ნიკა მელია