ნიკა მელია: ხელისუფლებას პოლიტიკური საყრდენი აღარ აქვს გარდა რეჟიმის მსახური "ზონდერი" პოლიციელებისა - ბრძოლა იქნება უწყვეტი, რომელიც მოედება მთელ ქვეყანას

"ხელისუფლება ყველაფერთან ერთად არის მკვლელი, არ ვერიდები, დიახაც, მკვლელი რეჟიმი, რომელსაც მორალური საყრდენი უკვე დიდი ხანია, გამოეცალა, პოლიტიკური საყრდენი მას აღარ აქვს გარდა რეჟიმის მსახური "ზონდერი" პოლიციელებისა", – ამის შესახებ "ნაციონალური მოძრაობის" თავმჯდომარემ, ნიკა მელიამ ბათუმში განაცხადა.

მელიას თქმით, რეჟიმი ძალიან ახლოს არის მარცხთან და ბრძოლა იქნება უწყვეტი, რომელიც მოედება მთელ ქვეყანას.

"სიმართლე გითხრათ, რაც უფრო მეტ ასეთ სისულელეს გააკეთებენ, მით უარესი მათთვის და მით უფრო სწრაფად დასრულდებიან. 

ეს უბრალოდ არის წინასაარჩევნოდ აღებული ვალდებულებების გასტუმრების დრო მათი ჭკუით, რადგან კამპანიას, თუ ამას კამპანია ერქვა, როცა ატარებდნენ, სხვადასხვა ადამიანებს, სხვადასხვა მოკრიმინალო ელემენტებსაც დაჰპირდნენ, მიწის ნაკვეთებსა და სხვადასხვა სიკეთეს გაუფორმებდნენ, აი, ამ ყველაფრის სისრულეში მოყვანას ემსახურებოდა დღევანდელი ეს აქტი, რაც ჩაიდინეს ბათუმში. 

მესმის, რომ ბევრ ჩვენს მოქალაქეს ერთ საათში უნდა, რომ რეჟიმი დაეცეს, ნახევარ საათში, 20 წუთში, ან 15 წუთში.

დიახაც, მეც ძალიან მინდა, რომ ხუთ წუთში დაეცეს, მაგრამ მე რასაც ვაკვირდები და მე რასაც ვხედავ, ეს რეჟიმი ეცემა და ამ რეჟიმის დაცემა ჩვენთვის შუალედური ამოცანა არის.

ჩვენი მთავარი ამოცანა არის რეჟიმის ჩამოშორების შემდეგ მართვის სადავეებიდან, რომლებმაც მიიტაცეს სახელმწიფო, დავიწყოთ ამ სახელმწიფოს განვითარება ისე, რომ სისხლი არ დავღვაროთ", - განაცხადა მელიამ.

მისივე თქმით, მიხეილ სააკაშვილის გათავისუფლებისთვის ბრძოლა იქნება ბოლომდე.

"ამ ყველაფერს სჭირდება გარკვეული დრო, ნუ იჩქარებთ. ეს იმას არ ნიშნავს, რომ 2-3 დღე აქცია შეიძლება არ ჩატარდეს, ვიღაცა წავიდა სადღაც სხვა საქმის საკეთებლად, არავითარ შემთხვევაში.

ბრძოლა დაიწყო იმ დღიდანვე და იმ წუთიდანვე, როდესაც რეჟიმმა ჩაიდინა ის, რაც ჩაიდინა, გააყალბა, მიიტაცა არჩევნები და სახელმწიფო, მძევლად აიყვანა მიხეილ სააკაშვილი.

ვიდრე ეს ორი მოცემულობა არ შეიცვლება და არ მოწესრიგდება ორივე მხრივ მდგომარეობა, არავინ, განსაკუთრებით, „ნაციონალური მოძრაობა“, არც ერთი მისი ამომრჩეველი და პარტიის წევრი არ აპირებს გულხელდაკრეფილი ლოდინს იმისას, ციური მანანა როდის გაათავისუფლებს მიხეილ სააკაშვილს, ან დაგვინიშნავს ახალ არჩევნებს", – განაცხადა ნიკა მელიამ.

დღეს, ბათუმისა და ზუგდიდი წინა მოწვევის საკრებულოებმა პროტესტის ფონზე 2022 წლის ბიუჯეტი დაამტკიცეს. ბათუმისა და ზუგდიდის საკრებულოებში ოპოზიციონერი დეპუტატები ძველი საკრებულოს მიერ ბიუჯეტის დამტკიცებას აპროტესტებენ. 

ამავე თემაზე:

🔲 ზუგდიდსა და ბათუმში საპროტესტო აქციებზე 6 პირი დააკავეს

🔲 „რასაც წამალი ვერ უშველის, უშველის დანა, რასაც დანა ვერ უშველის, უშველის ცეცხლი!“ - მურმან დუმბაძე