რა მომსახურებები და ანალიზები უფინანსდებათ პენსიონერებს საყოველთაო ჯანდაცვის სახელმწიფო პროგრამით

სახელმწიფოს მიერ საყოველთაო ჯანდაცვის პროგრამით საპენსიო ასაკს მიღწეულ პირებს რამდენიმე ანალიზი და მომსახურება უფინანსდებათ. 

საპენსიო ასაკის პირებისთვის უფასოა: ოჯახის ექიმის ამბულატორიული მომსახურება, ჯანმრთელობის მდგომარეობისა და რისკ-ფაქტორების შეფასება, პრევენციული ღონისძიებები, დაავადებათა დიაგნოსტიკა და მართვა, საჭიროების შემთხვევაში კი, მომსახურება ბინაზე კომპეტენციის ფარგლებში ოჯახის, ან სოფლის, ან უბნის ექიმის დანიშნულებით.

ექიმ-სპეციალისტების მიერ მოწოდებული ამბულატორიული მომსახურება, კერძოდ: ენდოკრინოლოგი, ოფთალმოლოგი, კარდიოლოგი, ნევროლოგი, ოტორინოლარინგოლოგი, გინეკოლოგი, უროლოგი, ქირურგი.

ასევე ექიმის დანიშნულებით ამბულატორიის დონეზე ფინანსდება ინსტრუმენტული გამოკვლევები. კერძოდ: ელექტროკარდიოგრაფია, საჭმლის მომნელებელი სისტემის, შარდსასქესო სისტემისა და მცირე მენჯის ღრუს ორგანოების ექოსკოპია, გულმკერდის რენტგენოსკოპია/რენტგენოგრაფია, ძვლების რენტგენოგრაფია. ამასთან, კომპიუტერული ტომოგრაფია სახელმწიფოს მიერ ასანაზღაურებელი თანხის 90%-ით ფინანსდება.

საპენსიო ასაკის ვეტერანებისთვის ჯანმრთელობის დაცვის საყოველთაო პროგრამით ასანაზღაურებელი თანხა სრულად იფარება.

გარდა ზემოაღნიშნულისა სახელმწიფო სრულად აფინანსებს ექიმის დანიშნულებით ამბულატორიულ დონეზე ჩატარებულ კლინიკურ-ლაბორატორიულ გამოკვლევებს, კერძოდ:

სისხლის საერთო ანალიზი, შარდის საერთო ანალიზი, კრეატინინის, ჰემოგლობინის ან/და ქოლესტერინის მაჩვენებლის განსაზღვრა, პროთრომბინის დრო (NR), ღვიძლის ფუნქციური სინჯები - ALT, AST, ფარისებრი ჯირკვლის ფუნქციური სინჯი - TSH, განავლის ანალიზის ფარულ სისხლდენაზე, შარდში ლიპიდების განსაზღვრა.

გეგმური ამბულატორიული მომსახურების მიღება ფინანსდება მხოლოდ იმ ამბულატორიაში ან პოლიკლინიკაში, სადაც მოქალაქეა რეგისტრირებული.