"რაღა დროს ჩემი დედაზე ლაპარაკია, ოთხმოცს გადავშორდი კაცი, მაგრამ რა ვიცოდი, მაშინ, სანატრელად რომ გამიხდებოდა საქმე და ვეღარსად მოვიძევდი დედას"

ჟურნალისტი ნუგზარ რუხაძე დედის დღესთან დაკავშირებით სოციალურ ქსელში ემოციურ პოსტს აქვეყნებს:

"რაღა დროს ჩემი დედაზე ლაპარაკია, ოთხმოცს გადავშორდი კაცი, მაგრამ, დამიჯერებთ, რომ გითხრათ, მენატრება-მეთქი? იმდენად მენატრება, რომ ხანდახან წინ გავწევ ხოლმე ხელს უნებლიედ, მის რბილ და სიფრიფანა ლოყაზე მოსაკიდებლად.

3 მარტი, კი ბატონო, მაგრამ, 365 დღიდან, დედის დღეა არაა ყველა? მე არ მახსოვს, იმის მერე, რაც წუთისოფელს განერიდა, ერთი დღეც კი, რომ არ ველაპარაკებოდე რაღაცაზე.

ხან ვეფერები, ხან ვეჯიჯღინები.

ძველებურად! 

როცა, იყო, ვფიქრობდი, დედას რა მოკლავს-მეთქი და არხეინად ვიყავი.

ახლა, ასე ძალიან რომ მინდა აქ იყოს, მივხვდი, რომ მისმა არყოფნამ დამასუსტა და უმწეობის შეგრძნება ამკიდა.

უცნაურს მეტყოდა ხოლმე ხანდახან და, შევეპასუხებოდი, რა გინდამეთქი ჩემგან, და თვალში სიყვარულ-ნარევი საყვედური აუციმციმდებოდა ჩემს ავყია ბიჭურ ტლინკისყრაზე.

რა ვიცოდი, მაშინ, სანატრელად რომ გამიხდებოდა საქმე და ვეღარსად მოვიძევდი დედას.

რამდენს ითმენდა, მაინც, ჰა? ან, როგორ ითმენდა, ან, რატომ ითმენდა, ნეტა! აუ, დედი, შენი თავი მომცა, ახლა, რა!

დედის დღეს გილოცავთ, ძვირფასო მეგობრებო!", - წერს რუხაძე.

საქართველოში დედის დღე, რომელიც სამ მარტს 1991 წლიდან აღინიშნება, საქართველოს პირველი პრეზიდენტის ზვიად გამსახურდიას მიერ არის დამკვიდრებულია.

ასევე დაგაინტერესებთ:

* "დედა ამქვეყნიური ანგელოზიაო, ჩემთვის ყველაზე ჭეშმარიტი ფორმულირებაა, ხო და გუშინ ანგელოზთცვენის მომსწრე ვიყავი" - ნიკო კვარაცხელიას დედის ემოციური პოსტი

* "ამიზა სად ვიყავი წასული" - გიორგი კეკელიძე დედის მიერ გამოგზავნილ წერილს აქვეყნებს