"სააკაშვილი ძალიან დასუსტებულია, მაგრამ არ აპირებს შიმშილობის შეწყვეტას" - ლიზა იასკო

სააკაშვილი ძალიან დასუსტებულია, მაგრამ არ აპირებს შიმშილობის შეწყვეტას, გუშინდელმა დღემ კარგ ხასიათზე დააყენა,  – ამის შესახებ რადას დეპუტატმა და მიხეილ სააკაშვილის ახალმა პარტნიორმა ლიზა იასკომ, რუსთავის მე-12 პენიტენციური დაწესებულებიდან გამოსვლის შემდეგ განაცხადა.

მან საპატიმროში საქართველოს ყოფილი პრეზიდენტი მიხეილ სააკაშვილი მოინახულა.

" ეს მისი შიმშილობის მე-15, თუ მე-16 დღეა. ძალიან დასუსტებულია და სამწუხაროა, რომ მის პირად ექიმს რამდენიმე დღის განმავლობაში არ უშვებდნენ.

ის დიდ მადლობას ეუბნება ქართველ ხალხს გუშინდელი დღის გამო, მისთვის ეს ძალიან მნიშვნელოვანია, საბრძოლო განწყობაზეა. გაიგო ქართველი ხალხის ხმა, ეს ძალიან გულისამაჩუყებელი იყო და სურს, ამით არ გაჩერდნენ.

რაც შემეხება მე, რა თქმა უნდა, მინდა, არ შიმშილობდეს და არ იყოს ციხეში. ვიცი, რამდენი საქმე დატოვა კიევში, ძალიან კომფორტული ცხოვრება, მშვენიერი პოზიცია, კომფორტული პირობები, სახლი, მაგრამ აქ ჩამოვიდა ქართველი ხალხისთვის, რადგან ძალიან უყვარს.

ჩვენთვის ახლა ძალიან მნიშვნელოვანია, რომ გამოვიდეს ციხიდან და ყველაფერი გავაკეთოთ მის გასათავისუფლებლად", – განაცხადა ლიზა იასკომ.

საქართველოს მესამე პრეზიდენტი მიხეილ სააკაშვილი 1 ოქტომბერს, თბილისში დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება.