შალვა პაპუაშვილი: დროებითი საგამოძიებო კომისია თავის დასკვნას და ანალიზს დადებს. ყველას დავულაგებთ ფაქტებს - ევროპარლამენტსაც, ევროკომისიასაც და სხვებს, ვინც სააკაშვილს მფარველობდნენ, თუ რასთან გვქონდა საქმე

ეს კომისია თავის დასკვნას და ანალიზს დადებს. ყველას დავულაგებთ ფაქტებს - ევროპარლამენტსაც, ევროკომისიასაც და სხვებს, ვინც სააკაშვილს მფარველობდნენ, თუ რასთან გვქონდა საქმე, როგორ ხუჭავდნენ თვალებს დიქტატორზე, მწამებელზე, რეკეტიორზე და დღეს საერთოდ როგორ ბედავენ და ესარჩლებიან ასეთი კრიმინალის ჩამდენ ადამიანს, - განაცხადა შალვა პაპუაშვილმა პარლამენტის დროებითი საგამოძიებო კომისიის მუშაობაზე საუბრისას.

მედიის კითხვებზე პასუხის გაცემის დროს პარლამენტის თავმჯდომარემ ყურადღება გაამახვილა იმაზე, რომ „ნაციონალური მოძრაობის“ რეჟიმს საგარეო მხარდაჭერა ჰქონდა.

„აი, ეს იყო ის რეჟიმი, რომელიც ჩახუტებული ჰყავდა ევროკავშირსაც. შეგახსენებთ, ამ რეჟიმის ელიტის წარმომადგენლებს მისცა უვიზო მიმოსვლა 2010 წელს - რეჟიმს, რომელიც აწამებდა ხალხს ციხეებში, ბიზნესს არეკეტებდა, ხოლო ქართველი ხალხი დაგვტოვა სავიზო რეჟიმში და მხოლოდ „ქართულმა ოცნებამ“ შეძლო ის, რომ ყოფილიყო ჩვეულებრივი მოქალაქეებისთვისაც უვიზო რეჟიმი.

100 ტრაგედია მოისმინეთ და ამ 100 ტრაგედიას ალბათ ერთ ყურში უშვებენ, მეორიდან გამოუშვებენ დღესაც.

შეგახსენებთ, ზუსტად იმ დროს, გორბაჩოვის თანამებრძოლი ქალბატონი იუკნევიჩიანე იყო ლიეტუვის მთავრობის წევრი, ხოლო მთავრობის ხელმძღვანელი იყო ბატონი კუბილიუსი. გახსოვთ მაშინ ქალბატონი რასას, ან მისი პრემიერ-მინისტრის რომელიმე განცხადება, რომ წამება, მედიის მიტაცება დაეგმო საქართველოში? იმ ხალხის წახალისებული და იმ ხალხის შემოქმედება იყო მიხეილ სააკაშვილი. ამიტომ, ახლა ეს კომისია ეხება მათ შორის მიხეილ სააკაშვილის მფარველებს. სინამდვილეში, მათაც ვახედეთ სარკეში, როგორი დიქტატორული რეჟიმი შეგვიქმნეს 21-ე საუკუნეში ქართველ ხალხს ევროპელებმა და მათ შორის ზოგიერთმა ამერიკელმა, რომლებიც დღემდე მიხეილ სააკაშვილის მფარველები არიან და დღემდე აწვალებენ ქვეყანას სააკაშვილის ხსენებით“, - განაცხადა პაპუაშვილმა.