"დის ის არველაძეს ქანთრი, არველაძის ქანთრი - იოხ დეპრესიონ!" - როგორ ულოცავს გიორგი კეკელიძე ძმებ არველაძეებს დაბადების დღეს

ეროვნული ბიბლიოთეკის დირექტორი, მწერალი გიორგი კეკელიძე, ფეისბუკის საკუთარ გვერდზე წერს:

"გასული წლის გაზაფხულზე თურქეთში მანქანით გადავედით მე და ჩემი მოადგილე და მეგობარი, მირიან ხოსიტაშვილი. 18 მაისს რიზეში ქართულ ბიბლიოთეკას ვხსნიდით. ეს იყო ჩემი ყველაზე საზარელი მოგზაურობა - დეპრესიის და შფოთვების ჯომოლუნგმაზე გახლდით გაცრეცილი თოკით ჩამოკიდული.

 დერეალიზაციის მარწუხები სამყაროს გისოსებში აქცევდა და მე სადღაც გარეთ მტოვებდა. მთელი სხეული მეწვოდა და ამ ცეცხლზე ცრუ წყლად ვისხამდი ტრანკვილიზატორებს, რომელიც სინამდვილეში ნავთის საქმეს აკეთებდა. აკვიატებული აზრები დანებებული ტვინიდან სიმშვიდის ბოლო ნარჩენებს კორტნიდნენ. გზაზე მაღალ შენონებს ჩუმი შვებით ავყურებდი, როგორც პოტენციურ ადგილს იმ საქმის აღსასრულებლად, რაც უკან დაბრუნებისას მალევე ვცადე.

მაგრამ ჩემი ობსესიურობა მავალებდა ავადმყოფურ პასუხისმგებლობას: რიზეს უნივერსიტეტის რექტორი მელოდა და რაღაც მანქანებით წავახოხე თავი. იქ ორი დღე დავყავით.

თითქმის არაფერი მახსოვს, მხოლოდ ქართული ბიბლიოთეკის გახსნის წამები ბუნდოვნად და კიდევ ერთი უცნაური სცენა. უნივერსიტეტის კიბეზე ვზივარ და ვცდილობ მტანჯველი ფიქრები გავწყვიტო. ვინდომებ, არ გამოდის.

ხან თავს გადავიქნევ ხოლმე, თითქოს ასე ამოიფერთხება. მოდის ერთი მოხუცი კაცი, დიდი სათვალეებით და ცილინდრით და გვერდით მიჯდება. მეკითხება - პრობლემ? რობოტივით გავხედე და ინგლისურად ვუპასუხე, კი მეთქი.

და ვუხსნი რატომაც. მაშინ ყველა გამარჯობის მთქმელს ვეუბნებოდი რაც მჭირდა, თითქოს ვინმეს მაინც ექნებოდა მათგან ჯადოსნური ჯოხით. უკვე ცოტა დამტვრეული ინგლისურითვე მეკითხება, საიდან ხარო? ვუთხარი. ოოო, გურჯისტან? - ისმის გაოცება. ცოტა ხანი იფიქრა და გაღიმებულმა მითხრა: დის ის არველაძეს ქანთრი, არველაძის ქანთრი - იოხ დეპრესიონ!  

ანუ არველაძეების ქვეყნის შვილთან დეპრესიას რა უნდაო - ასე გამამხნევა და წავიდა. მერე, გვიან, როცა ჯოჯოხეთიდან გამოსასვლელ გზებს დავადექი, სულ მახსენებოდა ეს გულწრფელი და გულუბრყვილო სიტყვები და ღიმილად მყოფნიდა. დაბადების დღეს (50 წელი) ვულოცავ ტყუპებს. ბარემ გუშინვე ვაპირებდი, მაგრამ გადადებას საპატიო მიზეზი ჰქონდა.

Shota Arveladze Achi Arveladze" - წერს გიორგი კეკელიძე.