„ისინი დაუნდობლად ლანძღავენ და მიწასთან ასწორებენ მათ, ვინც გაბედავს საწინააღმდეგო აზრის გამოთქმას...“ - რას წერს მანანა მგალობლიშვილი აქციის მონაწილეებზე?

გინეკოლოგ-რეპროდუქტოლოგი მანანა მგალობლიშვილი სოციალურ ქსელში სტატუსს აქვეყნებს და ქვეყანაში მიმდინარე მოვლენებს ეხმაურება.

როგორც იგი წერს, სოციალურ ქსელებში ადამიანების გარკვეული ჯგუფები სიძულვილის, დეზინფორმაციის და ისტერიული აგრესიის კომპანიას აწარმოებენ. 

„24 საათის განმავლობაში სოციალურ ქსელებში, განსაკუთრებით კი ფეისბუკზე, ადამიანების გარკვეული ჯგუფები სიძულვილის, დეზინფორმაციის და ისტერიული აგრესიის კომპანიას აწარმოებენ.

ისინი დაუნდობლად ლანძღავენ და შეიძლება ითქვას მიწასთან ასწორებენ მათ, ვინც გაბედავს საწინააღმდეგო აზრის გამოთქმას, სწორედ ამიტომ ბევრი ერიდება სოციალურ ქსელში საკუთარი აზრის დაფიქსირებას და უბრალოდ დუმს. მაგრამ ამ „დუმილსაც” არ ჰპატიობენ და ახორციელებენ მათზე ზეწოლას, „მოღალატეებს”, „რუსეთის მონებს” უწოდებენ და პირდაპირ მიუთითებენ, რომ ამოეწერონ მათი „ფრენდებიდან” იმის გამო, რომ მათთვის სასურველ პოზიციას არ აფიქსირებენ.

არაა აუცილებელი, ადამიანს თავში ქვა ჩაარტყა, ან იარაღი დაუმიზნო, რისი გაიდეალიზირების და რომანტიზების მცდელობაც აქვთ სხვათა შორის ამ პირებს, აღნიშნული ქმედებებიც ადამიანებზე უხეში ძალადობა და სრულიად ამაზრზენი მოვლენაა.

მსგავსი აგრესია და სიძულვილის ენა მე არ მახსოვს არასდროს, მხოლოდ 90-იანი წლები, როცა ოჯახები იყო გახლეჩილი განსხვავებული აზრის გამო, მაგრამ ვთვლი, რომ მაშინ საბჭოთა წყობიდან ახლად გამოსული სამოქალაქო საზოგადოება გამოუცდელი და მოუმწიფებელი გახლდათ. ამდენი წლის შემდეგ კი ასე მგონია ისევ იმ წრეზე ვტრიალებთ და ნუთუ ოდნავ მაინც არ გავზრდილვართ და არ გავნათლებულვართ იმ დონეზე, რომ ერთმანეთი ასე მდაბიოდ არ ვლანძღოთ განსხვავებული აზრის გამო და გავიხსენოთ, რომ ევროპული ფასეულობების ერთ-ერთი მთავარი ქვაკუთხედი სწორედ სხვა ადამიანის აზრის პატივისცემაა“, - წერს მანანა მგალობლიშვილი.