"კაი ზნისაა მარა, მგონია არ დადგება კაი შესახედავი ხომ იცი შენ? რავარც მე ამიხდა, ასე აგიხდეთ ყველაფერი!" - ზურა შევარდნაძე ბებია-ბაბუის დიალოგზე ემოციურ მოგონებას აქვეყნებს

ფლორისტი, "გარდენიას" დამფუძნებელი ზურა შევარდნაძე სოციალურ ქსელში ბავშვობის მოგონებას იხსენებს და ბებია-ბაბუაზე ემოციურ წერილს წერს:

"ვიქნებოდი ასე  ხუთი შეიძლება ექვსი წლის.

საღამოს ბებიამ ფეხები დამითბილა, ხელპირი დამბანა, ბაბუამ ზურგზე შემისვა და ზუკუტურით ამიყვანეს ოდაში, გახამებულ თეთრეულში, გამზეურებულ ქვეშაგებში ჩამაგორეს. 

ძილის წინ გამოწერილივით იყო :

"დავწობი დამეძინება, სიზმარი დამესიზმრება, ცხრა ხატი ცხრა ანგელოზი თავსტუმალს დამესვენება.

ჯვარი გვწყალობს ჯვარცმული, ვერას გვაკლებს მაცდური..."

რომ დარწმუნდა დამეძინა შუბლზე მაკოცა, საბანი შემომიკეცა და თავის ოთახში გავიდა.

ვისაც ხის სახლში ერთი ღამე მაინც გაუთევია ყველამ იცის, რომ ლაპარაკი კი არა ამოსუნთქვაც ისმის წაბლის ხის ფარღალალა კედლებში.

ბებიამ ბაბუას შესჩივლა "ბიჯო, ბიჭი ყორიფელობამდე კაია, კაი ზნისაა მარა მგონია არ დადგება კაი შესახედავი ხომ იცი შენ?!"  

გავინაბე, მართლა მოვიმძინარე თავი, როგორ მინდოდა ბაბუას მაინც ვგონებოდი ლამაზი და კაი სანახავი მარა გავწბილდი.

"არ იდარდო ქალო, რაუჭირს, ბიჭია,  გული კაი აქ, ნამეტარი მოყვასია, რა გინდა დაავალო აფერი არ ეზარება, სენთიანია, ენაწყლიანია, შრომა ეყვარება და გეიტანს თავს და ცხოვრებას რაცხაფერა.."

იმ ღამეს არ მიძინია..

ისე ყველაფერი აგიხდეთ და აგისრულდეთ რავარც მე...

ქე ვარ ასე უშნოდ მარა სენთიანად მთელი ცხოვრება))",- წერს ზურა შევარდნაძე.

ასევე დაგაინტერესებთ:

* პუტინმა კადიროვს დაბადების დღეზე გენერალ-პოლკოვნიკის წოდება მიანიჭა

* წლის საუკეთესო მასწავლებლის ტიტული - ინგლისურის ენის პედაგოგმა ხულოდან, როლანდ შავაძემ მიიღო