„მილანის“ ინტერესს ხვიჩა კვარაცხელიასთან დაკავშირებით, იტალიური მედია არ ადასტურებს

იტალიური მედია „მილანში“ ხვიჩა კვარაცხელიას გადასვლასთან დაკავშირებულ ცნობებს გამოეხმაურა.

ზოგადი შეფასებით, ინტერესი არსებობს, მაგრამ საქართველოს ნაკრებისა და ყაზანის „რუბინის“ 20 წლის ფეხბურთელის ტრანსფერს ჯერ არ ადასტურებენ.

„ზაფხულში „მილანს“ ბევრ ფეხბურთელთან ჰქონდა კონტაქტი. ბოლო რამდენიმე საათია, ბევრს საუბრობენ ყაზანის „რუბინის“ ვარსკვლავ ხვიჩა კვარაცხელიას ტრანსფერზე, მაგრამ როგორც ჩანს, მილანელები სხვა მიმართულებით მუშაობენ“, – ინფორმაციას sempremilan ავრცელებს.

„კვარაცხელიასთან დაკავშირებით „მილანის“ იდეა, როგორც ჩანს, არ შეცვლილა: მოთამაშეს აკვირდებიან, მაგრამ ამჟამად არანაირი მოლაპარაკება და ინტერესი არ არსებობს“, – ამის შესახებ ჟურნალისტი დანიელ ლონგო წერს.

ყაზანის „რუბინის“ პრესსამსახურმა Twitter-ზე კვარაცხელიას შესაძლო წასვლაზე მასმედიაში მუდმივად გავრცელებულ ხმებზე ხუმრობით უპასუხა:

გუნდმა გამოაქვეყნა ხვიჩას ფოტო, რომელსაც ხელში მუყაოს ფირფიტა უჭირავს, სადაც წერია – „კმარა წერა, რომ სადღაც მივდივარ“.

რუსული გამოცემა Metaratings.ru- ს 25 ივლისს წერდა, რომ საქართველოს ნაკრებისა და ყაზანის „რუბინის“ თავდამსხმელი ხვიჩა კვარაცხელია კარიერას იტალიურ გრანდში, „მილანში“ გააგრძელებს, რაც სიცრუე აღმოჩნდა.