Bloomberg: ახლო აღმოსავლეთში მიმდინარე ომმა ევროპის ენერგობაზარზე გავლენა იქონია - ივლისში ბელგია სრულად გადავიდა რუსული თხევადი ბუნებრივი აირის იმპორტზე

ახლო აღმოსავლეთში მიმდინარე ომმა ევროპის ენერგობაზარზე გავლენა იქონია - ივლისში ბელგია სრულად გადავიდა რუსული თხევადი ბუნებრივი აირის იმპორტზე, - იუწყება საინფორმაციო სააგენტო Bloomberg-ი.

Bloomberg-ის ცნობით, გასულ თვეს ბელგიის მიერ იმპორტირებული თხევადი ბუნებრივი აირი რუსული წარმოშობის იყო. ეს ცვლილება გამოიწვია ევროპაში მიწოდების მკვეთრმა შემცირებამ, რაც, ახლო აღმოსავლეთში მიმდინარე ომის გამო, ჰორმუზის სრუტეში ნაოსნობის შეფერხებით იყო განპირობებული.

გაზის მაღალმა ფასებმა ევროპელ მყიდველთა უმეტესობას ზამთრის მარაგებისთვის თხევადი ბუნებრივი აირის შესყიდვის სურვილიც დაუკარგა.

მიუხედავად იმისა, რომ ბელგიის მიერ შესყიდული რუსული თხევადი ბუნებრივი აირის მოცულობა წლის დასაწყისთან შედარებით ნაკლები იყო, შექმნილმა ვითარებამ ევროკავშირის ენერგეტიკული პოლიტიკის განხორციელება გაართულა. აპრილიდან ევროკავშირმა აკრძალა რუსულ თხევად აირზე ახალი მოკლევადიანი კონტრაქტების დადება, ხოლო იმპორტის სრული აკრძალვა მომავალ წელს უნდა შევიდეს ძალაში.

Bloomberg-ის ცნობით, ივლისში ბელგიის თხევადი ბუნებრივი აირის მთლიანი იმპორტი გასული წლის ანალოგიურ პერიოდთან შედარებით 40%-ზე მეტით შემცირდა. ამავდროულად, ქვეყანამ დაახლოებით 0.4 მილიონი მეტრული ტონა რუსული თხევადი აირი შეიძინა. ბელგია ასევე აგრძელებს ნორვეგიიდან და დიდი ბრიტანეთიდან მილსადენის გაზის მიღებას.

გერმანული არასამთავრობო ორგანიზაცია Urgewald-ის მონაცემები აჩვენებს, რომ 2026 წლის პირველ ნახევარში ევროკავშირის ქვეყნებმა 16%-ით მეტი რუსული თხევადი ბუნებრივი აირი შეიძინეს, ვიდრე წინა წლის იმავე პერიოდში და ამ შესყიდვებზე თითქმის 6 მილიარდი ევრო დახარჯეს. ყველაზე მსხვილი მყიდველები საფრანგეთი, ბელგია და ესპანეთი იყვნენ.

რუსეთი აშშ-ის შემდეგ ევროკავშირისთვის თხევადი ბუნებრივი აირის მეორე უმსხვილეს მომწოდებლად რჩება. მთელ ევროპაში გაზის საცავების დაბალი დონისა და ახლო აღმოსავლეთიდან მიწოდებასთან დაკავშირებული გაურკვევლობის ფონზე, ზოგიერთი ექსპერტი უკვე ეჭვქვეშ აყენებს, შეძლებს თუ არა ევროკავშირი რეალურად რუსულ თხევად აირზე უარის თქმას დაგეგმილ ვადებში.