ისრაელის პრეზიდენტი „წითელი ჯვრის“ ხელმძღვანელს მოუწოდებს, მძევლების მიმართ ყურადღება გამოიჩინოს

„ისრაელის პრეზიდენტი ცდილობს „წითელი ჯვრის“ ხელმძღვანელზე ზეწოლა მოახდინოს და მძევლებისთვის ყურადღების მიქცევა აიძულოს“, - ამის შესახებ THE TIMES OF ISRAEL წერს.

საუბარია ევიატარ დავიდსა და რომ ბრასლავსკიზე, რომელთა კადრებიც „ჰამასის“ მიერ გამოქვეყნებული ვიდეოებიდან გავრცელდა. როგორც ისააკ ჰერცოგი აღნიშნავს, მძევლები „ძალიან ცუდად გამოიყურებოდნენ“, ამიტომაც „წითელი ჯვრის“ საერთაშორისო კომიტეტსა და მის პრეზიდენტს მირიანა სპოლარიჩს მიმართავს, რომ „ყველანაირად იმოქმედონ მძევლების დასახმარებლად“.

„მათი[მძევლების] ჯანმრთელობის მდგომარეობა მძიმეა. შიმშილის შედეგად, კანიდან ძვლები უჩანთ. ისინი სიცოცხლისთვის საშიშ მდგომარეობაში იმყოფებიან“, - აღნიშნავს ისრაელის პრეზიდენტი და დასძენს, რომ „ეს კადრები მკაფიოდ უსვამს ხაზს, მათთვის საკვებით და გადაუდებელი სამედიცინო დახმარებით უზრუნველყოფის აუცილებლობას“.
შეგახსენებთ, კვირას, 3 აგვისტოს ისრაელის პრემიერ-მინისტრი ბენიამინ ნეთანიაჰუ ტელეფონით „წითელი ჯვრის“ დელეგაციის ხელმძღვანელს ესაუბრა და ანალოგიურად მოითხოვა, დაუყოვნებლივ მიეღოთ ზომები მძევლების მოსავლელად.

ნეთანიაჰუსთან საუბრის შემდეგ, „წითელი ჯვრის“ საერთაშორისო კომიტეტმა კიდევ ერთხელ, მოუწოდა „ჰამასს“, მიეცათ ღაზაში მყოფ მძევლებთან წვდომის საშუალება. ცნობისთვის, მათგან 20 პირი, ჯერ კიდევ, ცოცხალია.