მაიკ ჯონსონი აცხადებს, რომ ზელენსკი „გონს უნდა მოეგოს“ და მადლიერების ნიშნად მოლაპარაკების მაგიდას დაუბრუნდეს

აშშ-ის წარმომადგენელთა პალატის სპიკერის, მაიკ ჯონსონის განცხადებით, უკრაინის პრეზიდენტი, ვოლოდიმირ ზელენსკი „გონს უნდა მოეგოს“ და მადლიერების ნიშნად მოლაპარაკებების მაგიდას დაუბრუნდეს, წინააღმდეგ შემთხვევაში ეს სხვამ უნდა გააკეთოს. ამის შესახებ მან NBC News-თან საუბრისას განაცხადა.

„პრეზიდენტი ტრამპი ცდილობს ეს ორი მხარე მშვიდობის წერტილამდე მიიყვანოს. ის, რაც პრეზიდენტმა ზელენსკიმ გააკეთა თეთრ სახლში, ფაქტობრივად ჩვენთვის სიგნალი იყო, რომ ის ჯერ არ არის ამისთვის მზად და ვფიქრობ, ეს დიდი იმედგაცრუებაა“, - განაცხადა ჯონსონმა.

ჟურნალისტის კითხვაზე იყო თუ არა კრემლის ლიდერი „გამარჯვებული“ იმით, რაც თეთრი სახლის ოვალურ კაბინეტში მოხდა, მაიკ ჯონსონმა თქვა - „არა, არ იყო“.

შეგახსენებთ, 28 თებერვალს ოვალურ კაბინეტში უკრაინისა და შეერთებული შტატების პრეზიდენტებსა და აშშ-ის ვიცე-პრეზიდენტს შორის კამათი მოხდა.

„შენ თამაშობ ბანქოს, შენ მილიონობით ადამიანის სიცოცხლეს ეთამაშები. მესამე მსოფლიო ომს ეთამაშები. მესამე მსოფლიო ომს ეთამაშები და რასაც აკეთებ, არის ძალიან უპატივცემულო ქვეყნის მიმართ, ამ ქვეყნის მიმართ, რომელიც შენ მხარს გიჭერდა გაცილებით უფრო მეტად, ვიდრე ძალიან ბევრი ადამიანი ამბობს, რომ უნდა ექნათ“, - მიმართა ტრამპმა ზელენსკის ოვალურ კაბინეტში.