მარკო რუბიო: მოუთმენლად ველით აზერბაიჯანთან თანამშრომლობის გაღრმავებასა და ერთობლივ მუშაობას

 ჩვენ მოუთმენლად ველით თანამშრომლობის გაღრმავებას და ერთობლივ მუშაობას, რათა უზრუნველვყოთ მშვიდობიანი და კეთილდღეობით სავსე მომავალი აზერბაიჯანისა და მთელი რეგიონისთვის, - განაცხადა აშშ-ის სახელმწიფო მდივანმა, მარკო რუბიომ აზერბაიჯანის დამოუკიდებლობის დღისადმი მიძღვნილ განცხადებაში, რომელიც სახელმწიფო დეპარტამენტის ვებგვერდზე გამოქვეყნდა.

„ჩვენი პარტნიორობა, რომელიც ბოლო 33 წლის განმავლობაში შეიქმნა, კვლავაც უწყობს ხელს საერთო ინტერესების წინ წაწევას უსაფრთხოების, ენერგეტიკული თანამშრომლობისა და ეკონომიკური ზრდის მიმართულებით. აშშ კვლავაც ერთგული რჩება აზერბაიჯანში ფუნდამენტური თავისუფლების მხარდაჭერის, მათ შორის პრესის თავისუფლების მიმართ, აზერბაიჯანის კონსტიტუციის შესაბამისად“, - აღნიშნა მარკო რუბიომ.

„ამერიკელი ხალხის სახელით, მინდა მოგილოცოთ თქვენ და აზერბაიჯანელ ხალხს დამოუკიდებლობის დღე. ჩვენ მხარს ვუჭერთ აზერბაიჯანის სუვერენიტეტს, დამოუკიდებლობასა და ტერიტორიულ მთლიანობას. ამერიკის შეერთებული შტატები აგრძელებს რეგიონში მშვიდობისა და სტაბილურობის ხელშეწყობის ძალისხმევის მხარდაჭერას, რაც გადამწყვეტია სამხრეთ კავკასიის კეთილდღეობისთვის, და ჩვენ მივესალმებით წელს აზერბაიჯანსა და სომხეთს შორის მიღწეულ შეთანხმებას სამშვიდობო ხელშეკრულების ტექსტზე. ჩვენ ასევე ვაღიარებთ აზერბაიჯანის მზარდ მნიშვნელობას, როგორც ენერგომიმწოდებლისა და სატრანსპორტო კვანძის“, - დასძინა მან.