NYT: გერმანია, საფრანგეთი და დიდი ბრიტანეთი უკრაინის საკითხზე მოლაპარაკებების საკუთარ ფორმატს ამზადებენ

გერმანია, საფრანგეთი და დიდი ბრიტანეთი რუსეთ-უკრაინის ომის დასასრულებლად მოლაპარაკებების საკუთარ ფორმატს ამზადებენ, - წერს The New York Times-ი წყაროებზე დაყრდნობით.

როგორც ევროპელმა ოფიციალურმა პირებმა გამოცემასთან საუბარში აღნიშნეს, ეს სამი ქვეყანა შიშობს, რომ აშშ-ის პრეზიდენტი დონალდ ტრამპი მათ რუსეთსა და უკრაინას შორის ომის დასრულების შესახებ ნებისმიერი მოლაპარაკების მიღმა დატოვებს. სწორედ ამიტომ, მათ ძალების გაერთიანება გადაწყვიტეს, რათა მოლაპარაკებების მაგიდასთან ევროპის ადგილი უზრუნველყოფილი იყოს.

გამოცემის თანამოსაუბრეებმა ასევე განაცხადეს, რომ საფრანგეთი და გერმანია ევროპული პოზიციის ჩამოყალიბებაში წამყვან როლს ასრულებენ. დიდი ბრიტანეთი კი, რომელსაც ახალი პრემიერ-მინისტრი ჰყავს, მნიშვნელოვან გაურკვევლობას იჩენს, ნაწილობრივ იმის გამო, რომ ტრამპთან ურთიერთობების რისკის ქვეშ დაყენებას შიშობს.

ევროპელები მოელიან, რომ რუსეთთან უკრაინაზე ნებისმიერი მოლაპარაკება აშშ-ის ხელმძღვანელობით წარიმართება და, რადგან რუსეთი აძლიერებს უკრაინის ტერიტორიის სარაკეტო დაბომბვას, მათ სურთ, რომ ტრამპმა და მისმა წარმომადგენლებმა მოსკოვთან დიალოგი განაახლონ.

თუმცა, უკრაინაში სიტუაციის მოწესრიგება და რუსეთთან ურთიერთობები ევროპისთვის მეტისმეტად მნიშვნელოვანია იმისთვის, რომ ისინი განუსაზღვრელი ვადით მიანდონ ტრამპის ადმინისტრაციას, რომელიც სულ უფრო არაპროგნოზირებადი ჩანს. მათ სურთ დარწმუნდნენ, რომ ვაშინგტონი და მოსკოვი მათ ზურგს უკან არანაირ შეთანხმებას არ დადებენ.

ცოტა ხნის წინ მედიისთვის ცნობილი გახდა, რომ გასულ თვეს ვენაში დიდ ბრიტანეთის, საფრანგეთის, გერმანიისა და რუსეთის ყოფილ მაღალჩინოსნებს შორის შეხვედრა გაიმართა, რომლის მიზანიც უკრაინაში ომის დასასრულებლად სამშვიდობო მოლაპარაკებების შესაძლო პირობების განხილვა იყო.