სენატორი ლინდსი გრემი აცხადებს, რომ აშშ უახლოეს დღეებში უკრაინას იარაღის რეკორდულ მარაგს მიაწვდის

აშშ უახლოეს დღეებში უკრაინას იარაღის რეკორდულ მარაგს მიაწვდის, – ამის შესახებ ამერიკელმა სენატორმა, ლინდსი გრემმა „სიბიეს ნიუსთან“ ინტერვიუში განაცხადა.

ამერიკელმა სენატორმა აღნიშნა, რომ ყველა უნდა დაელოდოს აშშ-ის პრეზიდენტის, დონალდ ტრამპის გამოსვლა 14 ივლისს.

ლინდსი გრემმა ასევე თქვა, რომ არ სურს, წინასწარ ისაუბროს დეტალებზე, თუმცა აღნიშნა, რომ აშშ ევროპელი მოკავშირეებისთვის უზარმაზარი რაოდენობის იარაღის გაყიდვას დაიწყებს, რაც უკრაინისთვის სასარგებლო იქნება.

გრემმა დასძინა, რომ ტრამპის მიერ რუსეთის პრეზიდენტ ვლადიმერ პუტინის მოლაპარაკებებზე დაყოლიების რამდენიმეთვიანი მცდელობის შემდეგ, ახლა გარდამტეხი მომენტია.

„ტრამპმა რუსეთს კარი ღია დაუტოვა და ეს კარი მალე დაიხურება. შეერთებული შტატების სენატში კონგრესის სანქციების 85 თანასპონსორი მყავს. ტრამპს აქვს ურო პუტინის ეკონომიკასა და ყველა იმ ქვეყნის წინააღმდეგ, რომელიც მის საომარ მანქანას უჭერს მხარს. ჩინეთი, ინდოეთი და ბრაზილია რუსეთიდან ყიდულობენ ნავთობს, ნავთობპროდუქტებსა და სხვა საქონელს. პუტინი ამ ფულს ომისთვის იყენებს. კონგრესის ეს პაკეტი, რომელსაც ჩვენ განვიხილავთ, პრეზიდენტ ტრამპს მისცემს შესაძლებლობას, დააწესოს 500-პროცენტიანი ტარიფები ნებისმიერ ქვეყანაზე, რომელიც ეხმარება რუსეთს და მხარს უჭერს პუტინის საომარ მანქანას. მას შეუძლია, გაზარდოს ან შეამციროს ტარიფები. მას შეუძლია 0 პროცენტამდე ან 500 პროცენტამდე ავიდეს. მას აქვს მაქსიმალური მოქნილობა. ეს ნამდვილად ძლიერი უროა, რომელიც ტრამპს აქვს ამ ომის დასასრულებლად“, – აღნიშნა ლინდსი გრემმა.