The New York Times-ი: ვენესუელაში ტრამპის სპეცოპერაციის შედეგად, სულ მცირე 40 ადამიანი დაიღუპა

 ვენესუელაზე აშშ-ის მთავრობის ხელმძღვანელობით განხორციელებული თავდასხმის შედეგად, სულ მცირე 40 ადამიანი დაიღუპა, მათ შორის ჯარისკაცები და მშვიდობიანი მოქალაქეები, - აღნიშნულის შესახებ The New York Times-ი ვენესუელელ მაღალჩინოსანზე დაყრდნობით იტყობინება.

აშშ-ის პრეზიდენტმა დონალდ ტრამპმა განაცხადა, რომ სპეცოპერაციის დროს არც ერთი ამერიკელი ჯარისკაცი არ დაღუპულა. თუმცა, მან მიანიშნა, რომ ზოგიერთი სამხედრო მოსამსახურე დაშავდა.

გაერთიანებული შტაბების ხელმძღვანელმა, გენერალმა დენ კეინმა პრესკონფერენციაზე აღნიშნა, რომ აშშ-ის ვერტმფრენებს, რომლებიც პრეზიდენტ ნიკოლას მადუროს და მისი მეუღლის გამოსაყვანად მოძრაობდნენ, ცეცხლი გაუხსნეს.

მან თქვა, რომ ერთი ვერტმფრენი დაზიანდა და ყველა ამერიკული თვითმფრინავი „შინ დაბრუნდა“.

ორი ამერიკელი მაღალჩინოსნის ცნობით, რომლებმაც ანონიმურობის პირობით ისაუბრეს, განაცხადეს, რომ ვენესუელის პრეზიდენტის დაკავების ოპერაციის დროს დაახლოებით ექვსი ჯარისკაცი დაშავდა.

ინფორმაციისთვის, თეთრი სახლის ლიდერმა დონალდ ტრამპმა 3 იანვარს განაცხადა, რომ შეერთებულმა შტატებმა წარმატებით განახორციელა დარტყმა ვენესუელისა და ნიკოლას მადუროს წინააღმდეგ, რომელიც მეუღლესთან ერთად დააკავეს და ქვეყნიდან გაიყვანეს.

ამერიკული მედიის ინფორმაციით, მადურო ბრუკლინში წინასწარი დაკავების იზოლატორში გადაიყვანეს.

ვენესუელის უზენაესმა სასამართლომ ვიცე-პრეზიდენტ დელსი როდრიგესს პრეზიდენტის მოვალეობის შესრულება დაავალა.