„აუცილებელია აშშ-მა და რუსეთმა ერთმანეთში ისაუბრონ, ჩვენც მოგვიწევს რუსეთთან საუბარი დეოკუპაციასთან დაკავშირებით, ჩვენც გვაქვს დასაბრუნებელი ტერიტორიები“ - მაჭავარიანი

„რა თქმა უნდა, რუსეთ-უკრაინის ომი უნდა დასრულდეს, ამას ალტერნატივა, რა თქმა უნდა, არ გააჩნია და შესაბამისად, აუცილებელი არის, რომ აშშ-მა და რუსეთმა ერთმანეთში ისაუბრონ“, - ამის შესახებ ფრაქცია „ქართული ოცნების“ თავმჯდომარის მოადგილემ ლევან მაჭავარიანმა განაცხადა.

როგორც დეპუტატი აღნიშნავს, საქართველოსაც მოუწევს რაღაც ეტაპზე რუსეთთან საუბარი დეოკუპაციასთან დაკავშირებით, ვინაიდან, ჩვენც გვაქვს დასაბრუნებელი ტერიტორიები.

„ისევ დაუბრუნდა ჩვენი რადიკალური ოპოზიცია და მისი მიმდევრების გარკვეული ნაწილი იმ რიტორიკას, რა რიტორიკითაც მოიხსენიებდნენ ბატონ ტრამპს გასული 4 წლის განმავლობაში. თითქოს ის არის - რუსეთის აგენტი და პუტინის კაცი, ეს არის - აბსურდი. ბატონი ტრამპი არის აშშ-ის პრეზიდენტი და პირველ რიგში, იგი ემსახურება თავისი ქვეყნის, თავისი ხალხის ინტერესებს და რა თქმა უნდა, როდესაც ომი უნდა დასრულდეს და ომის ერთი მხარე არის რუსეთი, შენ უნდა დაჯდე და რუსეთთან ისაუბრო.

ჩვენც მოგვიწევს რაღაც ეტაპზე და შეიძლება გეოპოლიტიკური კონიუნქტურა ისე სწრაფად იცვლება, რუსეთთან საუბარი დაჩქარდეს, ვინაიდან, ჩვენც გვაქვს დასაბრუნებელი ჩვენი ტერიტორიები და რა თქმა უნდა, ჩვენი საუბარი უნდა შედგეს დეოკუპაციასთან დაკავშირებით. თუ ვინმე იმას მიიჩნევს, ჩვენ აფხაზ და ოსს დებთან და ძმებთან შერიგება ისე შეიძლება მოხდეს და ჩვენი ტერიტორიის ისე შეიძლება შედგეს რომ ამაში რუსეთი ჩართული არ იყოს, რა თქმა უნდა, ის ძალიან ცდება. შესაბამისად, ჩვენც მოგვიწევს, რა თქმა უნდა, ასეთი ტიპის საუბრები.

აშშ რუსეთს რომ არ ესაუბრებოდეს მაშინ რა ხდება? უკრაინა უნდა დაინგრეს თავიდან ბოლომდე და ის 20 თუ 25%, რაც ოკუპირებული არის 100-ვე პროცენტი უნდა იყოს ოკუპირებული?! ან თუ ნატო ჩაერთვება ამ ომში, მაშინ რა ხდება? რატომ არ იაზრებს ამას ჩვენი რადიკალური ოპოზიცია და მათი ამომრჩევლის რაღაც ნაწილი, ბირთვულ ომში, მესამე მსოფლიო ომში უნდა გადაიზარდოს ეს ყველაფერი?! რა თქმა უნდა, ეს ომი უნდა დასრულდეს, ამას ალტერნატივა, რა თქმა უნდა, არ გააჩნია და შესაბამისად, აუცილებელი არის, აშშ-მა და რუსეთმა ერთმანეთში ისაუბრონ.

როდესაც კონტაქტი წყდება მაგ შემთხვევაში იწყება კონფლიქტი და კონფლიქტი ვერ გადაიჭრება თუ ეს კონფლიქტი არ არის ამდგარი და ჩვენ მივესალმებით იმას, რომ ეს კონტაქტი აღდგა და შესაბამისად, შემდეგი ნაბიჯები იქნება და შეიძლება თებერვლის ბოლომდე შეხვდნენ ერთმანეთს ტრამპი და პუტინი ერთმანეთს.  რაც უფრო მალე დაასრულებენ ამ ტრაგედიას, მით უკეთესი, რა თქმა უნდა, პირველ რიგში, უკრაინელებისთვის, უკრაინელი ხალხისთვის და მით უკეთესი მსოფლიოსთვის“, - აღნიშნავს მაჭავარიანი.