ალეკსანდარ ჯიკიჩი - ქართველმა კალათბურთელებმა ქვეყნისთვის ყველაფერი გააკეთეს

 საქართველოს საკალათბურთო ნაკრების მთავარმა მწვრთნელმა, ალეკსანდარ ჯიკიჩმა თბილისში დანიის ეროვნულ გუნდთან გამართული შეხვედრა შეაფასა.

ქართველმა კალათბურთელებმა მეტოქე დაძაბულ ბრძოლაში 62:60 დაამარცხეს და ევროპის ჩემპიონატის ფინალური ეტაპის საგზური ზედიზედ მეექვსედ მოიპოვეს.

„რთულ მატჩს ველოდით. ამ სანაკრებო პაუზის დროს ერთ-ერთ საუკეთესო მცველებთან, ლიუნდბერგთან და შილდსთან მოგვიხდა დაპირისპირება, ახლა მსგავსი უკანახაზელები არავის ჰყავს ევროპაში. დანიასთან გასვლაზე მარცხი ჩვენს ფარზე მათმა ბევრმა მოხსნამ განაპირობა, დღეს კი ამ პრობლემის გამოსწორება გვსურდა.

ქართველმა კალათბურთელებმა ქვეყნისთვის ყველაფერი გააკეთეს. ბოლდუინი ვარჯიშზე დაშავდა და ჩემთვისაც რთული ამოსახსნელია, როგორ მოახერხეს მოთამაშეებმა დანიასთან მატჩზე ფოკუსირება, რადგან იცოდნენ, რომ ასეთი მნიშვნელობის ფიგურა დავკარგეთ.

ჯერ არ მიფიქრია, რომელ ქვეყანაში ვისურვებდი ევროპის ჩემპიონატზე თამაშს. სადაც წილისყრის შემდეგ მოვხვდებით, იქ ვიასპარეზებთ. რთული ჯგუფი გავიარეთ, ფინეთსა და სერბეთს ვეთამაშეთ, მაგრამ წარმატებას მაინც მივაღწიეთ“, – განაცხადა ჯიკიჩმა.

2025 წლის ევრობასკეტი ევროპის ოთხ ქალაქში – რიგაში, ტამპერეში, კატოვიცესა და ლიმასოლში ჩატარდება. ფინალური ეტაპის წილისყრა 27 მარტს რიგაშია დაგეგმილი, ხოლო კონტინენტის პირველობა 27 აგვისტოდან 14 სექტემბრის ჩათვლით გაიმართება.