„ბანერებით ცდილობდა, თითქოს გამიჯვნოდა „ნაცმოძრაობას“, შემდეგ დაბულინგდა, გარე უფროსებისგანაც, შეიძლება, საყვედური მიიღო და მოუწია ბანერის აღება“ - მაჭავარიანი გახარიაზე

„ჩემი ვარაუდით, ამ ბანერებით გიორგი გახარია ცდილობდა, თითქოს გამიჯვნოდა „ნაცმოძრაობას“. შემდეგ ძალიან დაბულინგდა. შეიძლება, საერთო გარე უფროსებისგანაც საყვედური მიიღო და მოუწია ბანერების აღება“, - ამის შესახებ ფრაქცია „ქართული ოცნების“ თავმჯდომარის მოადგილემ ლევან მაჭავარიანმა განაცხადა, რითაც გამოეხმაურა სამი ოპოზიციური გაერთიანების წევრებისთვის სადეპუტატო უფლებამოსილების შეწყვეტის შემდეგ „გახარია news საქართველოსთვის“ ფეისბუკგვერდზე გამოქვეყნებულ ბანერს.

მისი თქმით, თუ ისინი [გახარიას გუნდი] განცხადებას შეიტანენ პარლამენტში მანდატების დატოვებასთან დაკავშირებით, საპარლამენტო უმრავლესობა „მყისიერად დაუკმაყოფილებს“.

„გუშინ ვიხილეთ ქარდების კამპანია გახარიას პარტიის მხრიდან. სერიოზული ბულინგი წავიდა კოლექტიური „ნაციონალური მოძრაობიდან“. შემდეგ მათ ეს ქარდები აიღეს. როგორ შეთანხმდებიან, ჩვენთვის საინტერესო არ არის. უფრო სწორად, რა დავალებაც წამოვა, იმის მიხედვით იმოქმედებენ.

თუ არ ვცდები, მაისამდე არის ის ვადა, როცა პარლამენტის საქმიანობაში მონაწილეობას თუ არ მიიღებენ, ავტომატურად შეუწყდებათ მანდატები ან პირადი განცხადებები უნდა შემოიტანონ, რასაც მყისიერად დავუკმაყოფილებთ. დანარჩენს დრო გვაჩვენებს.

ძალიან საინტერესო იყო ქარდები, როდესაც ბატონმა გახარიამ „ნაცებად“ მოიხსენია „ქართული ოცნება“, ეს ღიმილის მომგვრელია. ჩვენს მოქალაქეებს შევახსენებ, რომ გიორგი გახარიას კოალიცია აქვს გაფორმებული ოთხ მუნიციპალიტეტში „ნაციონალურ მოძრაობასთან“ ერთად, ეს ნურავის დაავიწყდება.

ჩემი პირადი ვარაუდია, რომ ამ ბანერებით იგი ცდილობდა, თითქოს გამიჯვნოდა „ნაციონალურ მოძრაობას“. შემდეგ ძალიან დაბულინგდა. შეიძლება, მათი საერთო გარე უფროსებისგანაც ამის გამო საყვედური მიიღო და მოუწია ბანერების აღება“, - აღნიშნა მაჭავარიანმა.