დავით მათიკაშვილი ბაჩო ახალაიაზე: შორს ვარ იმ აზრისგან, რომ ეს ადამიანი ყოფილიყო ბოლომდე ჩამოცილებული ნეგატიურ პროცესებს, რასაც კოლექტიური „ნაცმოძრაობა“ ჩვენს ქვეყანაში ახორციელებდა

მე შორს ვარ იმ აზრისგან, რომ ეს ადამიანი ყოფილიყო ბოლომდე ჩამოცილებული ნეგატიურ პროცესებს, რასაც კოლექტიური „ნაცმოძრაობა“ ჩვენს ქვეყანაში ახორციელებდა, - განაცხადა საპროცედურო საკითხთა და წესების საპარლამენტო კომიტეტის თავმჯდომარემ, დავით მათიკაშვილმა ბაჩო ახალაიაზე საუბრისას.

იგი ახალაიას განცხადებას გამოეხმაურა და ჟურნალისტებთან გაკეთებულ მის რეპლიკას ცინიკური უწოდა.

„ალბათობის მაღალი ხარისხით შესაძლებელია, რომ მისი მონაწილეობის ხარისხი საგამოძიებო სტრუქტურების მიერ იქნეს დადგენილი, როგორც აქტიური ამ ყველაფერში, თუნდაც ის რეპლიკები და პასუხები, რაც ჟურნალისტებს ბაჩო ახალაიამ გასცა დღეს საგამოძიებო ორგანოში შესვლამდე, მიუთითებს, რომ რა თქმა უნდა, ეს ადამიანი ეთანხმება, მხარს უჭერს იმ ძალადობასა და ხელისუფლების დამხობის მცდელობას, რომელიც 4 ოქტომბერს ჰქონდა. ის ცინიკური რეპლიკა, რომ ეს თურმე, 9 აპრილის მსგავსი აქცია იყო, ყველაფერს წერტილს უსვამს“, - განაცხადა მათიკაშვილმა.

საქართველოს თავდაცვის ყოფილმა მინისტრმა, ბაჩო ახალაიამ ცენტრალური კრიმინალური პოლიციის დეპარტამენტში გამოკითხვაზე შესვლამდე ჟურნალისტებთან კომენტარი გააკეთა და აღნიშნა: „4 ოქტომბერი არის იმ რანგის მშვიდობიანი სამოქალაქო აჯანყების დღე, როგორიც იყო 9 აპრილი, მრცხვენია და მიტყდება, რომ არაფერში არ ვიყავი ჩართული“.