კულტურის კომიტეტმა 2026 წლის სახელმწიფო ბიუჯეტის პროექტს მხარი დაუჭირა

პარლამენტის კულტურის კომიტეტმა 2026 წლის სახელმწიფო ბიუჯეტის პროექტი განიხილა, რომელიც სხდომაზე ფინანსთა მინისტრის პირველმა მოადგილემ გიორგი კაკაურიძემ წარადგინა.

მომხსენებელმა კომიტეტის წევრებს ძირითადი მაკროეკონომიკური პარამეტრები, ეკონომიკური ტენდენციები და მთავარი პრიორიტეტები გააცნო.

გიორგი კაკაურიძემ ცალკეული სამინისტროების დაფინანსებაზე ისაუბრა და განსაკუთრებული ყურადღება კულტურის სამინისტროზე გაამახვილა.

„კულტურის სამინისტროს დაფინანსება 319 მილიონი ლარით განისაზღვრა, საიდანაც სახელოვნებო სფეროში უმაღლესი განათლების დაფინანსება 23 მილიონ ლარს აღემატება. სახელოვნებო დაწესებულებების მხარდაჭერისთვის 8,3 მილიონი ლარი, ხოლო კულტურის განვითარების ხელშეწყობისთვის 155 მილიონ ლარზე მეტია გამოყოფილი. კულტურული მემკვიდრეობის დაცვისა და სამუზეუმო სისტემის მხარდასაჭერად 80 მილიონ ლარზე მეტია განსაზღვრული. ინფრასტრუქტურული პროექტების დაფინანსებისთვის, რაც ძირითადად სხვადასხვა კულტურული ობიექტის რეაბილიტაციას გულისხმობს, 40 მილიონი ლარია გათვალისწინებული“, - განაცხადა გიორგი კაკაურიძემ.

კულტურის სამინისტროს ბიუჯეტის ზრდა დადებითად შეაფასა კულტურის კომიტეტის თავმჯდომარე გიორგი გაბუნიამ. როგორც მან აღნიშნა, აღნიშნული პოზიტიური ტენდენცია პირდაპირ გამომდინარეობს ქვეყნის ეკონომიკური განვითარებიდან. კომიტეტის თავმჯდომარემ რეგიონებში მოქმედი კულტურის ორგანიზაციების მხარდაჭერისა და ხელშეწყობის აუცილებლობაზე გაამახვილა ყურადღება. მისივე თქმით, რეგიონებსა და მუნიციპალიტეტებში აქტიურად მიმდინარეობს კულტურის სახლებისა თუ სხვადასხვა კულტურული დაწესებულების განახლება/რეაბილიტაცია, რაც კიდევ უფრო მეტ შესაძლებლობას შექმნის კულტურის სფეროს წარმომადგენლებისთვის.

კულტურის კომიტეტმა 2026 წლის სახელმწიფო ბიუჯეტის პროექტს მხარი დაუჭირა.

სხდომაზე ფინანსთა მინისტრის პირველმა მოადგილემ 2025 წლის სახელმწიფო ბიუჯეტის შესრულების 6 თვის მიმოხილვაც წარადგინა, რომელიც კომიტეტმა ცნობად მიიღო.