დღეს მშვიდობის სახელით ბრძოლისუნარიანობისა და წინააღმდეგობის გაწევის უნარის ჩაკვლა ხდება - თეონა აქუბარდია

პრობლემა არ არის მხოლოდ „გირჩის“ ბიბლიური თავისუფლება, პრობლემაა სახელმწიფოს დამოკიდებულება, რომელმაც 30 წლის მანძილზე საბჭოური ტიპის გაწვევა ვერ შეცვალა , - ამის შესახებ ოპოზიციონერმა დეპუტატმა, თეონა აქუბარდიამ სავალდებულო სამხედრო სამსახურის რეფორმასთან დაკავშირებით „პალიტრანიუსის“ გადაცემა „რეზიუმეში“ განაცხადა.

მისი თქმით, თუ სამშობლოს დაცვა ყველას ვალია, მაშინ ეს ყველა უნდა იყოს რეალურად ყველა და არა მხოლოდ ის ადამიანები, რომლებსაც არ შეუძლიათ თავი დაიძვრინონ.

„სამშობლოს დაცვა თუ ყველა მოქალაქის ვალია - რომელი პოლიტიკოსის შვილი გახსოვთ ჯარში? - მე მახსოვს ირაკლი ალასანიას შვილი და მეტს ვერ ვიხსენებ. რატომ არ არის ეს საყოველთაო და ყველასთვის?! თუ ჩვენ ვამბობთ, რომ სამშობლოს დაცვა ყველას ვალია, მაშინ ეს ყველა უნდა იყოს, რეალურად ყველა და არა მხოლოდ ის ადამიანები, რომლებსაც არ შეუძლიათ თავი დაიძვრინონ მოსაკრებლის გადასახადით, რომელიც 2000 ლარია, ან უმაღლეს სასწავლებელში ჩაბარებით.

მე მყარად ვარ დარწმუნებული, რომ სავალდებულო სამსახური აუცილებელია. მე არ ვეთანხმები, რომ გასაუქმებელია. ძალიან ბევრი ქვეყანა, რომელსაც გაუქმებული ჰქონდა, დაუბრუნდა. გაწვევის სისტემა უნდა გვქონდეს მყარი და არა საბჭოური, რომელიც დღემდე გვაქვს. 30 წელია ვერ ავაშენეთ ისეთი სისტემა მხოლოდ თავდაცვის მიზნებს მოემსახურება. მყარად ვარ დარწმუნებული, რომ სისტემა უნდა არსებობდეს, მაგრამ უნდა არსებობდეს ისეთი სისტემა, სადაც ყველა წავა ჯარში და არ იქნება ის შესაძლებლობები, რომ თავი დაიძვრინონ და პრესტიჟული იქნება ჯარში მსახურება და პოლიტიკა ორიენტირებული, რომ თავდაცვისუნარიანობა იყოს ამაღლებული. დღეს მშვიდობის სახელით აბსოლუტურად ბრძოლისუნარიანობის და წინააღმდეგობის გაწევის უნარის ჩაკვლა ხდება საზოგადოებაში და ამ ვითარებაში რატომ უნდა წავიდეს ახალგაზრდა ჯარში, ეს კითხვები ობიექტურად არსებობს.

პრობლემა არ არის მხოლოდ „გირჩის“ ბიბლიური თავისუფლება, პრობლემაა სახელმწიფოს დამოკიდებულება, რომელმაც 30 წლის მანძილზე საბჭოური ტიპის გაწვევა ვერ შეცვალა“, - განაცხადა თეონა აქუბარდიამ.

ასევე საინტერესოა:

🔵 ამერიკაში 30 წლის ემიგრანტი გარდაიცვალა - გიორგი ნინიკური საქართველოდან ერთი თვის წინ წავიდა

🔵 „მამას ბოლო პენსია“ - ეძებენ 5 ლარიანის პატრონს, რომელმაც კუპიურაზე ეს ემოციური წარწერა გააკეთა