ექიმებისთვის და ექთნებისთვის მინიმალური ანაზღაურება განისაზღვრა - მთავრობის დადგენილება ვრცლად

საქართველოს ჯანდაცვის მინისტრის, ზურაბ აზარაშვილის განცხადებით, მთავრობის დღევანდელ სხდომაზე მიიღეს დადგენილება, რომლის მიხედვითაც, ექიმებისა და ექთნებისთვის მინიმალური ანაზღაურება განისაზღვრა.

ზურაბ აზარაშვილის თქმით, მინიმალურ ანაზღაურებად ექთნებისთვის განისაზღვრა 792 ლარი, ექიმებისთვის კი 1 260 ლარი.

"მივიღეთ მნიშვნელოვანი დადგენილება, რომელიც ეხება ექიმებისა და ექთნებისთვის მინიმალურ ანაზღაურებას. მოგეხსენებათ, ექიმებისა და ექთნების ძალიან დიდი რაოდენობა გვყავს, რომლებიც, სამწუხაროდ, ძალიან დაბალ ანაზღაურებას იღებდნენ.

ვფიქრობთ, სამედიცინო სერვისებზე გადახდებით, რასაც სახელმწიფო საყოველთაო ჯანდაცვიდან ანაზღაურებს, მიზანშეწონილია, ექიმებისა და ექთნებისთვის ხელფასების ყოველთვიური მინიმალური ოდენობა განისაზღვროს. ხაზს ვუსვამ, ეს არის ხელფასის მინიმალური ოდენობა.

რასაკვირველია, ამაზე მაღალი ხელფასის განსაზღვრა შეუძლიათ. ექთნების შემთხვევაში მინიმალური ხელფასია 792 ლარი, ექიმების შემთხვევაში – 1 260 ლარი. თავიდან, როდესაც ამის შესახებ განვაცხადეთ, იყო სპეკულირება, თითქოს ჩვენ განვსაზღვრეთ ფიქსირებული ხელფასები და ეს ხელფასი ძალიან დაბალია იმ შრომასთან, რასაც ექიმები და ექთნები ეწევიან.

რასაკვირველია, დაბალია, მაგრამ ეს არის მინიმუმი და არა ფიქსირებული ხელფასი", – განაცხადა ზურაბ აზარაშვილმა.

ასევე დაგაინტერესებთ:

* ომის დაწყებიდან დღემდე, რუსეთმა უკრაინაში 102 600 ჯარისკაცი დაკარგა - უკრაინის გენშტაბი

*"ეს არის სახელმწიფო გადატრიალების გეგმა, რომელიც უნდა მომხდარიყო..." - რაზე საუბრობს ლალი მოროშკინა