ირაკლი ქადაგიშვილი: თუ დავაკვირდებით ოპოზიციის ამ ე.წ. „რეგიონებში გასვლას“, ეს არის ფაქტობრივად ფიქცია, მათ შეხვედრები ძირითადად ნახევრად ცარიელ დარბაზში აქვთ

ჩვენ თუ დავაკვირდებით ოპოზიციის ამ ე.წ. „რეგიონებში გასვლას“, ეს არის ფაქტობრივად ფიქცია. მათ ძირითადად შეხვედრები აქვთ ნახევრად ცარიელ დარბაზში და ხვდებიან იმ აქტივს, რა აქტივის მობილიზების უნარიც ამ ეტაპზე გააჩნიათ, - განაცხადა გადაცემაში „იმედის კვირა“ პარლამენტის რეგიონული პოლიტიკისა და თვითმმართველობის კომიტეტის თავმჯდომარემ ირაკლი ქადაგიშვილმა ოპოზიციაზე საუბრისას.

მისივე თქმით, ოპოზიციას ნათქვამი აქვს, რომ 26 მაისს მორიგი პროვოკაცია უნდა მოაწყონ, ეს არის მათი მიზანი.

„ოპოზიციის ამ მიზანს დიდი ენთუზიაზმით რომ არ ხვდება რეგიონები და ხალხი, ამაზე დარბაზებში ხალხის სიმრავლეც ნათლად მეტყველებს. ზოგადად, რაც შეიძლება ითქვას, არის ის, რომ ოპოზიცია არის შინაარსისგან დაცლილი. არ შეიძლება, რომ შენ გერქვას ოპოზიცია და შენი მთავარი მიზანი იყოს რაიმე სახის პროვოკაცია მოაწყო, მუდმივად ისაუბრო იმაზე, რომ დასავლეთში ჩვენ ვიღაცამ უნდა დაგვასანქციროს, ხან თავისუფალი სიტყვა აკრძალოს, ხან თანამდებობის პირი დაასანქციროს, უკეთესია, თუ ქვეყანას დაასანქცირებენ, რომ ამან ქვეყანას ეკონომიკური პრობლემები შეუქმნას და ეს ეკონომიკური ზრდა რამენაირად შეაფერხოს“, - აღნიშნა ირაკლი ქადაგიშვილმა.