პროტოპრესვიტერი გიორგი ზვიადაძე: გვაქვს მოლოდინი, რომ ყველაფერი ძალიან ღირსეულად წარიმართება და სრული სამართლიანობით მოხდება ახალი პატრიარქის გამორჩევა, რომელსაც უდიდესი პასუხისმგებლობა ექნება წმინდა ეკლესიის და ერის წინაშე

საქართველოს კათოლიკოს-პატრიარქმა, უწმინდესმა და უნეტარესმა ილია მეორემ ღვთივმიმადლებული პიროვნული თვისებების წყალობით, უდიდესი ძალისხმევით, სულიერებითა და სიბრძნით შეძლო საქართველოს ეკლესიის აღორძინება, - განაცხადა გადაცემაში „იმედის კვირა“ პროტოპრესვიტერმა გიორგი ზვიადაძემ.

მისივე თქმით, ილია მეორემ შეძლო, რომ საქართველოს მართლმადიდებელ ეკლესიას დაებრუნებინა ის უდიდესი ავტორიტეტი, რაც მას ყოველთვის გამოარჩევდა სხვა ადგილობრივი მართლმადიდებელი ეკლესიებისგან და ამისთვის უდიდესი ძალისხმევა გასწია.

პროტოპრესვიტერმა განმარტება გააკეთა მართვა-გამგეობის დებულების კრიტერიუმებზე.

„დარწმუნებული ვარ, რომ მას შემდეგ, რაც გაფართოებულ კრებაზე ახალი პატრიარქის გამორჩევა მოხდება, სინოდი მიუბრუნდება ამ საკითხებს. იქნება ძალიან არგუმენტირებული და კვალიფიციური მსჯელობა ასაკთან დაკავშირებით, თუ როგორ უნდა განისაზღვროს, რომ რაიმე გაუგებრობა არ გამოიწვიოს ამ მოთხოვნამ, რომ რაც შეიძლება ზედმიწევნით იყოს ეს განსაზღვრული მართვა-გამგეობის დებულებაში და ცვლილების განხორციელებაც არის სავსებით შესაძლებელი წმინდა სინოდის წევრთა ინიციატივით“, - აღნიშნა პროტოპრესვიტერმა გიორგი ზვიადაძემ.

მან ასევე ისაუბრა ახალი პატრიარქის მომავალ არჩევნებზეც.

„უდიდესი სიმშვიდის საფუძველია ის, რომ საქართველოს მართლმადიდებელი ეკლესიის წმინდა სინოდის აბსოლუტურ უმრავლესობას ნათლად აქვს გაცნობიერებული ეს უდიდესი პასუხისმგებლობა ღვთის, ეკლესიისა და მთელი ჩვენი ქვეყნის წინაშე. ყველა მათგანი ცდილობს იმას, რომ გაფართოებული კრება იმ ღირსებით წარიმართოს, რა ღირსებასაც ამისთვის განსაზღვრავს საეკლესიო სამართლის ნორმები. ყველას გვმართებს ძალიან დიდი პასუხისმგებლობა და კორექტულობა, გვმართებს საეკლესიო ეთიკის დაცვა იმისთვის, რომ ნებით თუ უნებლიედ, ყოვლად უსაფუძვლო განცხადებით და მით უმეტეს ცილისწამებით გარკვეული ზიანი არ მივაყენოთ უწმინდესს, ეკლესიას და საეკლესიო სისავსეს.

ყველას გვაქვს მოლოდინი, რომ ეს ყველაფერი ძალიან ღირსეულად წარიმართება და სრული სამართლიანობით, რასაც ჩვენ ვუწოდებთ საღვთო სამართლიანობას, მოხდება ახალი პატრიარქის გამორჩევა, რომელსაც უდიდესი პასუხისმგებლობა ექნება როგორც წმინდა ეკლესიის, ასევე მთელი ჩვენი ერის წინაშე“, - განმარტა გიორგი ზვიადაძემ.