ირაკლი ზარქუა მამუკა ხაზარაძეს: მამუკა, მოიტანე ფული! იმ ფულს ჩვენ ბაღებს, სკოლებს და კარგ საქმეებს მოვახმართ

„მამუკა ხაზარაძე არასდროს ყოფილა საქართველოს და ქართველი ხალხის ინტერესების დამცველი“, - ასე გამოეხმაურა საპარლამენტო უმრავლესობის წევრი ირაკლი ზარქუა „ლელოს“ ლიდერის მამუკა ხაზარაძის განცხადებას, რომელშიც ის აღნიშნავს, რომ ამერიკის შეერთებულმა შტატებმა, შავი ზღვის რეგიონში საკუთარი გეოპოლიტიკური ინტერესების დასაცავად, ზეწოლა უნდა მოახდინოს „ქართული ოცნების“ ხელისუფლებაზე.

დეპუტატის თქმით, ხაზარაძე პოლიტიკაში უცხოური ინტერესების გამტარებლად მოვიდა.

„რაც შეეხება ხაზარაძის განცხადებას, ლუსტრაცია მოხდა ვის და როგორ ემსახურება. მამუკა ხაზარაძე არასდროს ყოფილა საქართველოს და ქართველი ხალხის ინტერესების დამცველი. ის ყოველთვის იყო ის, ვინც დღეს არის. ემსახურებოდა უცხოელ პატრონებს და პოლიტიკაში მოვიდა, ასევე, უცხოური ინტერესების გამტარებლად.

უცხო ქვეყანას ეუბნება, საქართველო დაისაჯოს. რატომ? იმიტომ, რომ მის არაადეკვატურ და გიჟურ იდეებს არ დაუჭირა მხარი ქართველმა ხალხმა. მას ჰქონდა შესანიშნავი შანსი, საუკუნის პროექტი - ანაკლიის პორტი აეშენებინა.

საქართველოს წინააღმდეგ სარჩელი შეიტანა და მილიარდობით დოლარს სთხოვდა ქართველი ხალხის და ბიუჯეტისგან. საერთაშორისო სასამართლომ იცით, რომ ის დაადანაშაულა და პირიქით, 600 000 დოლარი აქვს მოსატანი. მამუკა, მოიტანე ფული! იმ ფულს ჩვენ ბაღებს, სკოლებს და კარგ საქმეებს მოვახმართ, ფული მოიტანე, ბიჭო!“ - აღნიშნავს ზარქუა.