„ნაცმოძრაობის“ რეჟიმის მიერ დაზარალებული ბესიკ დანელია: ოჯახთან ერთად, ქუჩაში თავს დამესხა 20-მდე პირი, გლდანის მეტროს ჩასასვლელი არის ორი სართულის სიმაღლე, ზემოდან გადმომაგდეს, დაცემის შემდეგ დამესივნენ, რკინის ხელკეტებს მირტყამდნენ

2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების, 2003 წლიდან დღემდე, საქმიანობის შემსწავლელი საქართველოს პარლამენტის დროებითი საგამოძიებო კომისიის სხდომაზე, უფლებების შელახვის ფაქტებთან დაკავშირებით, „ნაციონალური მოძრაობის“ სისხლიანი რეჟიმის მიერ დაზარალებულმა ბესიკ დანელიამ ისაუბრა.

ბესიკ დანელიას თქმით, ოჯახთან ერთად მყოფს, ქუჩაში თავს დაესხა 20-მდე პირი, რომლებმაც ორი მეტრის სიმაღლის კიბიდან გადმოაგდეს, რის შედეგადაც, მრავლობითი მოტეხილობა მიიღო.

„2011 წლის 21 მაისს, ოჯახთან ერთად, ქუჩაში თავს დამესხა 20-მდე პირი, აქედან, იყო 5-6 პოლიციის ფორმაში ჩაცმული, მე ვიყავი გულით ავადმყოფ დედასთან, მეუღლესთან და 3 წლის შვილთან ერთად, ჩემთან ერთად, ასევე, იმყოფებოდნენ ჩემი პატიმარი მეგობრის მეუღლე მაია წულუკიძე და ჟურნალისტი ნათია ბერიძე, ირაკლი ზაალიშვილი, ჩემი მეგობარი ამ ამბავს დაადასტურებენ.

მე გავუწიე წინააღმდეგობა მათ, რის შემდეგაც, ფაქტობრივად, გლდანის მეტროს ჩასასვლელი არის 2 სართულის სიმაღლე, ამ ჩასასვლელთან, სანამ კიბეზე ჩახვალ, ზემოდან გადმომაგდეს ჭიდაობაში და ხელჩართულ ბრძოლაში. მარტო ვიყავი, დაცემის დროს დამიზიანდა ხერხემალი, მე-5 და მე-6 მალა იქნა ამოვარდნილი და მათ შორის, მოყვა ნერვი, იმიტომ რომ, ყოველ ხუთ წამში ვკარგავდი გონებას. დაცემის შემდეგ, ოცამდე პირი დამესია, რკინის ხელკეტებს მირტყამდნენ, სამი მოტეხილობა მქონდა, ფეხი სამ ადგილას გადამიტეხეს“, - განაცხადა ბესიკ დანელიამ.

ბესიკ დანელიას თქმით, აღნიშნული თავდასხმის შედეგად, ჯანმრთელობა შეერყა დედას, რის შემდეგაც გარდაიცვალა, შვილს შაქრიანი დიაბეტი დაემართა, ხოლო ორსულ მეუღლეს მუცელი მოეშალა.

„ასევე, დაზარალდნენ ჩემი ოჯახის წევრები ამ დღეს. ჩემს ფეხმძიმე მეუღლეს მოეშალა მუცელი, ასევე, მიიღო მრავლობითი დაზიანებები; დედა, რომელიც გულით ავადმყოფი იყო და სამი წლის შვილი, რომლებიც შოკის შედეგად, ძალიან ცუდად გახდნენ. დედას ძალიან მოკლე პერიოდში დაემართა ინსულტი და შემდეგ, განმეორებითი ინსულტის შედეგად გარდაიცვალა. ბავშვს განუვითარდა შაქრიანი დიაბეტი. ერთ-ერთი ძალიან მძიმე დღე იყო ჩემს ცხოვრებაში“, - განაცხადა ბესიკ დანელიამ.