"პრეზიდენტმა აფხაზეთი და ცხინვალის რეგიონი მოიხსენია, როგორც მეზობლები და საუბარი ჰქონდა მათ სუვერენულობაზე" - ირაკლი კობახიძე სალომე ზურაბიშვილს აკრიტიკებს

„ქართული ოცნების“ თავმჯდომარე ირაკლი კობახიძე საქართველოს პრეზიდენტის, სალომე ზურაბიშვილის 26 მაისის განცხადებას კრიტიკულად აფასებს და აცხადებს, რომ „პრეზიდენტმა პრაქტიკულად აფხაზეთი და ცხინვალი მეზობლებად მოიხსენა“.

"რაც შეეხება [პრეზიდენტის] სასამართლოსთან დაკავშირებულ განცხადებას, მე მგონი, სირცხვილი სწორედ ეს განცხადება იყო, ამას პირდაპირ და თამამად ვამბობ.

26 მაისს, საზეიმო დღეს, როდესაც არ იცი, რაზე უნდა ისაუბრო, ეს არის ძალიან სერიოზული პრობლემა და ამაზე უნდა მივუნიშნოთ პრეზიდენტს, რომ დავიცვათ პრეზიდენტის ინსტიტუტი, ეს არის სერიოზული პრობლემა.

ჯერ კონტექსტი უნდა იცოდე, როდის რა განცხადება გააკეთო და მეორე, შინაარსში, ოპოზიცია რომ აკეთებს არგუმენტების გარეშე განცხადებებს, ეს ერთია, მაგრამ როდესაც პრეზიდენტი აკეთებს უარგუმენტო განცხადებებს და თავს ესხმის სახელმწიფო ინსტიტუტს, ეს არის სერიოზული პრობლემა და ეს არის სერიოზული გადახვევა იმ როლიდან, რაც აქვს პრეზიდენტს, როგორც ინსტიტუტების გარანტს.

თუმცა ეს თავისთავად შეიძლება აღსანიშნავი არ ყოფილიყო იმ ფონზე, როდესაც პრეზიდენტმა პრაქტიკულად აფხაზეთი და ცხინვალის რეგიონი მოიხსენია, როგორც მეზობლები და საუბარი ჰქონდა მათ სუვერენულობაზე", – განაცხადა კობახიძემ.

რა განცხადება გააკეთა პრეზიდენტმა 26 მაისისადმი მიძღვნილ ღონისძიებაზე, იხილეთ ვრცლად 

სალომე ზურაბიშვილი: მოგმართავთ ჩვენს მოქალაქეებს აფხაზეთსა და ცხინვალში, საქართველო ომით და ძალით არაფერს დააპირებს თქვენ წინააღმდეგ, გთავაზობთ ერთიან ევროპულ მომავალთან შემოერთებას