რატი იონათამიშვილი არასრულწლოვანთა შესახებ კანონზე: იცვლება ის, რომ სახელმწიფოს მზრუნველობისა და მხარდაჭერის კომპონენტი ძლიერდება და უნდა ვაღიაროთ, რომ აქამდე ასე არ იყო

იცვლება ის, რომ სახელმწიფოს მზრუნველობისა და მხარდაჭერის კომპონენტი ძლიერდება და უნდა ვაღიაროთ, რომ აქამდე ასე არ იყო. სახელმწიფო თავის პოზიტიურ ვალდებულებას ვერ აწვდიდა იმ მოზარდებს, რომლებიც სჩადიოდნენ დანაშაულს თუნდაც 12-13 წლის ასაკში, - განაცხადა პარლამენტის ადამიანის უფლებათა დაცვის კომიტეტის თავმჯდომარემ რატი იონათამიშვილმა ახალ საკანონმდებლო ინიციატივაზე საუბრისას.

მისი თქმით, ასეთი შემთხვევა ბევრია, ამიტომ მნიშვნელოვანია ბავშვებთან სპეციალისტების მუშაობა და მულტიდისციპლინარული მიდგომები. დეპუტატმა მშობლის პასუხისმგებლობის ფაქტორსაც გაუსვა ხაზი.

„ბავშვთა კოდექსი იმიტომ იყო ერთ-ერთი უმნიშვნელოვანესი ამ მიმართულებით, რომ ოჯახს აძლიერებდა და მშობლის გაძლიერებაზე იყო მიმართული. ამ პროგრამებშიც მშობლის კომპონენტი არის ერთ-ერთი ყველაზე მნიშვნელოვანი, რასაკვირველია. ამ მხრივაც, ვფიქრობ, პოზიტიური მშობლის ინსტიტუტის გაძლიერებაც საინტერესო იქნება“, - განაცხადა იონათამიშვილმა.

მან ასევე 2024 წელს საქართველოს მიმართ გაეროს მიერ გაცემული რეკომენდაცია გაიხსენა, რომელშიც აღნიშნული იყო, რომ ქვეყანაში გამოწვევას წარმოადგენდა ის ფაქტი, რომ 14 წლამდე კანონთან კონფლიქტში მყოფი ბავშვებისთვის საკმარისი რესურსები და პროგრამები არ იყო მობილიზებული.

ბავშვების მიერ დანაშაულის ჩადენის გაზრდილ მაჩვენებლებს პარლამენტი საკანონმდებლო ცვლილებებით პასუხობს. საქართველოში გერმანული კანონის ზუსტი ანალოგი იმოქმედებს.